गण्डकी गाउँपालिका भित्रका ३० बिद्यालयमा इन्फरमेशन कम्युनिकेशन एण्ड टेक्नोलोजी (आइसिटी) तालिम प्रदान गरिएको छ ।

गाउँपालिका र नेपाल युथ फाउण्डेशनको समन्वयमा पालिका भित्रका ९ वटा मावि र २१ वटा आधारभूत विद्यालयमा तालिम संचालन गरिएको छ ।

---

---

बिद्यालयका प्रधानाध्यापक र शिक्षकलाइ तालिम दिइएको गाउँपालिका शिक्षा शाखा प्रमुख सुदिप पन्थले बताए ।

‘दुइ चरणमा तालिम संचालन गरेका हौ,’ उनले भने, ‘पहिलो चरणमा ज्ञानमार्ग मावि घ्याल्चोकमा १६ वटा बिद्यालयका प्रअ तथा शिक्षक र दोस्रो चरणमा ताङलीचोक मावि पातिस्वाँरामा १४ वटा बिद्यालयका प्रअ र शिक्षकहरुलाई तालिम दियौ ।’

तालिममा फाउण्डेशनका प्रमुख रमेश रेग्मीले सहजिकरण गरेका थिए ।

तालिममा सहभागी प्रत्यक बिद्यालयलाई एक÷एक थान ल्यापटप र टिभी वितरण गरिएको गाउँपालिकाले जनाएको छ । फाउन्डेशनको ३० लाख र गाउँपालिकाको ५ लाखको लागतमा उक्त आइसिटि सामग्री वितरण गरिएको शिक्षा शाखा प्रमुख पन्थले बताए ।

कार्यक्रमकै अवसरमा ग्लोबल समाज जापानले ३० वटा विद्यालयलाई एक÷एक वटा थर्म गन समेत हस्तान्तरण गरेको छ ।