गोरखा : पोखराबाट काठमाडौंतर्फ आउँदै गरेको यात्रुवाहक बस त्रिशूली नदीमा खस्दा १८ जनाको मृत्यु भएको छ भने २५ जना घाइते भएका छन्। दुर्घटना सोमबार बिहान करिब सवा १ बजेतिर धादिङको बेनीघाट रोराङ गाउँपालिकाको चरौदी नजिक चाइनाधारास्थित क्षेत्रमा भएको हो ।

ग२ख १४२१ नम्बरको बस अचानक अनियन्त्रित भई त्रिशूली नदीमा खसेको जिल्ला ट्राफिक कार्यालय धादिङका प्रमुख शिशिर थापाले जानकारी दिए। उनका अनुसार मृतकको संख्या १८ पुगेको पुष्टि भएको छ ।

दुर्घटनामा घाइते भएका २५ जनालाई तत्काल उद्धार गरी उपचारका लागि नजिकका अस्पताल पठाइएको राजमार्ग उद्धार व्यवस्थापन समितिका अध्यक्ष राजकुमार ठकुरीले बताए। बसमा ४५ भन्दा बढी यात्रु सवार रहेको प्रारम्भिक जानकारी छ ।

घटनापछि नेपाली सेना, सशस्त्र प्रहरी, नेपाल प्रहरी र स्थानीय बासिन्दाले संयुक्त रूपमा उद्धार कार्य गरिरहेका छन्। दुर्घटना रातिको समयमा भएकाले उद्धारमा केही कठिनाइ भइरहेको जनाइएको छ। घटनाको विस्तृत विवरण आउन बाँकी रहेको प्रहरीले जनाएको छ ।