उत्तरी गोरखाको रुइला भञ्ज्याङ नाका खोल्नका लागी आवश्यक प्रक्रिया अघि बढेको गण्डकी प्रदेशका भौतिक पूर्वाधार बिकास मन्त्री रामशरण बस्नेतले बताएका छन् ।

आइतवार जिल्ला सदरमुकाममा पत्रकारसँग कुराकानी गर्दै उनले नाका खुलाउनका लागी प्रधानमन्त्री कार्यालयबाट परराष्ट्र मन्त्रालयमा पत्राचार भइसकेको बताए । ‘अन्तराष्ट्रिय नाका खुलाउन त्यहि सहज हुदैन, धेरै प्रक्रिया पुरा गर्नुपर्ने रहेछ,’ उनले भने, ‘प्रक्रिया अगाडी बढाइसकेका छौ, नाका खुलाउन गण्डकी प्रदेश सरकार सधै तयार छ ।’

परराष्ट्र मन्त्रालयले तिब्बत सरकारलाई पत्रचार गरेर उनीहरुबाट पत्र आएपछि काम शुरु हुने उनले बताए । नाका खुलाउनका लागी हालसम्म ६ करोड रकम विनियोजन गरिसकेको उनले जानकारी दिए ।

पत्रकारसँग कुराकानी गर्दै उनले जिल्लामा प्रदेश अन्तरगत भएका बिकास निर्माणका कामहरु सन्तोषजनक रहेको बताए ।

प्रदेश सरकार अन्तरगत जिल्लामा स्तरोन्नती भइरहेका नौ वटा सडकको काम सन्तोषजनक रहेको उनले तर्क गरे ।

संघिय सरकारबाट हामीलाइ हस्तान्तरण भएका तीन वटा मोटरेवल पुलको काम भने सन्तोषजनक नरहेको उनले बताए । पालुङटार नगरपालिकाका दुई वटा र लुदी खोला माथि निर्माण भइरहेको मोटरेवल पुलको काममा भने समस्या भएको उनले जानकारी दिए ।