गोरखा : भूकम्पले क्षति पुगेको गुम्वा पुननिर्माणको काम ढिलाइ गरी शुरु भएको छ । भूकम्पको पाँच बर्षपछि मात्र जिल्लामा पुननिर्माणको काम शुरु भएको हो । यसअघि मर्मतको काम भएपनि पुननिर्माणको काम अघि बढ्न सकेको थिएन ।
रकम नआएका कारण काम हुन नसकेको राष्ट्रिय पुननिर्माण प्राधिकरण जिल्ला आयोजना कार्यान्वयन इकाइ अनुदान व्यवस्थापन तथा स्थानीय पूर्वाधार कार्यालय गोरखाले जनाएको छ । ‘मर्मतका लागी भनेर रकम आएपनि पुननिर्माणका लागी हालसम्म रकम आएको थिएन,’ कार्यालय प्रमुख रामशरण आचार्यले भने, ‘यो बर्ष रकम आयो अनि काम अघि बढाएका हौ ।’ यो बर्ष ९ वटा गुम्वा पुननिर्माणका लागी ५ करोड ४० लाख ८० हजार रकम विनियोजन भएको उनले बताए ।
उनका अनुसार यो बर्ष चुमनुव्री गाउँपालिका–४ को पालरी गुम्वा, किटेन गुम्वा, नाम्ला कार्डिङ छोय खोर्लिङ, वडा नम्वर २ को नववुद्ध ध्यान तथा शिक्षक केन्द्र, बारपाक सुलिकोट गाउँपालिका–३ को हिमाली समाज ककलिङ गुम्वा, वडा नम्वर १ को खुम्चे गुम्वा पुननिर्माण हुनेछन् । त्यस्तै अजिरकोट गाउँपालिका–४ को हिमाली समाज गुम्वा, आरुघाट गाउँपालिका–९ को सम्वाछ्यो खोर्लिङ बौद्ध गुम्वा र सिरानचोक गाउँपालिका–८ को पालतेन तमू गुम्वा पनि यसै बर्ष पुननिर्माण हुने उनले जानकारी दिए । ‘सम्झौता भएर काम शुरु भइसक्यो, असार मसान्तसम्ममा काम सक्नुपर्छ,’ उनले भने ।
कार्यालयको तथ्याङ्क अनुसार भूकम्पले जिल्लाका १०४ वटा गुम्वामा क्षति पु¥याएको थियो । ९१ वटामा पूर्ण र १३ वटामा आशिंक क्षति पुगेको कार्यालय प्रमुख आचार्यले बताए । पूर्ण क्षति भएका अधिकांश गुम्वा चुमनुव्री गाउँपालिकामा पर्छन् । आंशिक क्षति पुगेका गुम्वाहरु मर्मत भइसकेका छन् । करिव ८१ लाख खर्चेर मर्मत गरिएको आचार्यले बताए ।