गोरखा : भीमसेन थापा गाउँपालिका –५ बगुवा स्थित लामाचौरको एकीकृत बस्ती निर्माणको काममा ढिलाइ भएको छ ।
२०७३ माघबाट निर्माण सुरु भएको बस्तीका घर कहिले निर्माण पूरा हुन्छ टुंगो छैन । भूकम्पपीडित १ सय ३८ घरधुरीका लागि निर्माण भइरहेको उक्त वस्तीमा हालसम्म ४० घर धुरीको मात्र छाना छाउने काम सकिएको छ । भूकम्पले चर्काएको घरमा जस्ताको छेको हालेर बसेका केही भूकम्पपीडित भने छाना राखेपछिको फिनिसिङ नहुँदैको घरमा सर्न थालेका छन् । टहरोको बसाइ सकसपूर्ण भएकाले ‘फिनिसिङ’ नहुँदैको घरमा सर्नु परेको बल बहादुर श्रेष्ठले बताए । ७७ वर्षीय श्रेष्ठ आफैंले बनाउने योजनाका साथ नयाँ घरमा सरेका हुन् । उनका अनुसार रंगरोगन, प्लास्टर लगायतको काम बाँकी छरु। त्यसका लागि अझैं ४ लाख रुपैयाँ लाग्ने भए पनि पैसा नभएको उनले जानकारी दिए । केही भूकम्पपीडित छाना राखेर घर सर्न हतारोमा छन् । बगुवाका सय जनाभन्दा बढी भूकम्पपीडित टहरो र चर्किएको घरमै जोखिम मोलेर बसिरहेका छन् । ‘पुरानो बस्ती छाड्नैपर्ने छ,’ स्थानीय नारायण श्रेष्ठले भने, ‘चाडै घर सर्ने योजना बनाएर छाना छाउने काम सुरु गरेको छु ।’ घर बनाउन झन्डै ९ लाख रुपैयाँ खर्च लागेको उनले बताए । ‘सरकारको ३ लाख रुपैयाँ अनुदान हो, अरू सबै आफैंले व्यवस्था गर्नुपर्नेछ, पैसा पर्याप्त नहुँदा पनि घर निर्माण समयमै हुन नसकेको हो,’ उनले भने । भूकम्पपीडितले आफ्नै सक्रियता र अगुवाइमा एकीकृत बस्ती निर्माणको काम शुरु भएको हो । भीमसेन थापा गाउँपालिका–५ वगुवास्थित रिठेपानी, धरमपानी, नयाँगाउँ र पाण्डेगाउँको बस्तीलाई २०७२ वैशाख १२ को भूकम्पले थिलथिलो बनायो । भौगर्भिक हिसाबले पनि पुरानो बस्ती बस्न अयोग्य भएपछि भूकम्पपीडितकै सक्रियतामा लामाचौरमा सामूहिक बस्ती निर्माणाधीन छ । १ सय ३८ घर निर्माणका लागि दुई सय रोपनी जग्गा खरिद गरेका स्थानीयले गोलप्रथाद्वारा घडेरी चयन गरेर बस्ती निर्माण सुरु गरेका हुन् । वैशाखसम्म छाना राख्ने योजनाका साथ काम भइरहेको एकीकृत मिलन बस्ती पुनर्निर्माण तथा विकास समितिका उपाध्यक्ष कुमार श्रेष्ठले बताए । ‘बस्तीमा ढल, नाला लगायतका पूर्वाधार बनाउन अझै दुई वर्ष लाग्छ,’ उनले भने । विपन्न र आर्थिक अवस्था कमजोर रहेका ३० घरधुरी निर्माणको जिम्मा गैर सरकारी संस्थाले लिएको उनले बताए । एकीकृत बस्तीसँगै आधारभूत तहको विद्यालय, खेलमैदान, सामुदायिक भवन, पाहुना घर, बगैँचा लगायतका पूर्वाधार विकास गर्ने योजना समेत रहेको उनले जानकारी दिए ।