चैत ८, गोरखा  : गोरखा नगरपालिकाको बिभिन्न क्षेत्रमा राखिएका मध्य अधिकांश ‘कम्भेक्स मिरर’ मा क्षति पुगेको छ ।

सवारी दुर्घटना न्यूनिकरणका लागी भन्दै जिल्ला ट्राफिक प्रहरी कार्यालयको पहलमा केही बर्ष अघि गोरखा–आवुखैरेनी सडकखण्डको घुम्तिहरुमा मिरर राख्ने कामको सुरुवात भएको थियो । केही संस्थाहरुको सहयोगमा बसपार्क देखि गोरखा दरवार सडकखण्डमा पनि कम्भेक्स मिरर राखियो । सम्भावित दुर्घटनाको जोखिम भएका घुम्तिहरुमा मिरर राखिएपनि संरक्षण अभावमा अहिले अधिकांश क्षतिग्रस्त छन् । कतै मिरर फुटाइएको छ भने कतै मिरर स्ट्याण्डमा समेत क्षति पुगेको छ । तर क्षति विवरण बारे ट्राफिक कार्यालय र प्रहरी प्रशासन दुवै अनविज्ञ छन् । संरक्षणमा समेत उनीहरुले चासो नदिएको स्थानीयको गुनासो छ । नगर क्षेत्र भित्रको सडकमा कतिवटा कम्भेक्स मिरर राखिएको छ भन्ने तथ्याङ्क समेत ट्राफिक कार्यालयसँग छैन ।

जिल्ला ट्राफिक कार्यालयका इन्चार्ज मित्रलाल ढकालले क्षति पुगेकाहरुको मर्मतका लागी आवश्यक पहल भइरहेको बताए । ‘हाम्रो कार्यालय सँग बजेट छैन, नगरपालिकालाई भनेका थियौ तर काम हुन सकेको छैन,’ उनले भने । मर्मतका लागी आवश्यक समन्वय र पहल भइरहेको उनले बताए । दुर्घटना जोखिम न्यूनिकरणका लागी राखिएको मिररमा क्षति पुगेपनि वेवास्ता गर्दा दुर्घटनाको जोखिम बढेको भन्दै स्थानीयले गुनासो गरेका छन् ।