गोरखा : छेकम्पारमा स्थापना हुन लागेको शसस्त्र प्रहरीको बोर्डर अभजरभेसन पोष्ट (बिओपी) मा खटिने सुरक्षाकर्मीलाई अहिंसाको प्रतिवद्धता पालना गराउन स्थानीयले माग गरेका छन् ।

बिहीवार प्रमुख जिल्ला अधिकारीलाइ ज्ञापन पत्र बुझाउदै चुम श्याग्या संरक्षण समिति छेकम्पारले सयौ बर्ष देखि स्थानीयले पालना गर्दै आएको अहिंसाको प्रतिवद्धता सुरक्षाकर्मीले पनि पालना गर्नुपर्ने माग राखेका हुन् । चुम उपत्यका अन्तरगत साविकको चुम्चेत र छेकम्पार गाविसलाइ समेटेर सन् १९७७ सालमा अहिंसा क्षेत्र घोषणा गरिएको हो । सिमा सुरक्षाका लागी भन्दै सरकारले छेकम्पारमा शसस्त्रको बिओपी स्थापनाको तयारी गरिरहेको छ ।

बिओपीमा खटिने सुरक्षाकर्मीलाई पनि अहिंसाको प्रतिवद्धताहरु पालना गराउन प्रजिअ समक्ष चुम उपत्यकाका स्थानीयले माग गरेका हुन् । अहिंसाको प्रतिवद्धता अनुसार कुनै पनि जीव–जनावर काटमार गर्ने, शिकार खेल्ने, मह काड्ने, डडेलो लगाउने, पशुवध गर्ने जस्ता काम पूर्ण रुपमा निषेध गरिएको समितिका अध्यक्ष लोप्साङ लामाले बताए ।

मासुको प्रयोजनका लागी व्यापार गर्ने उदेश्यले कुनै पनि जीव एंव पंक्षिलाइ उक्त क्षेत्रमा प्रवेश गर्न रोक लगाइएको उनले जानकारी दिए । ज्ञापन पत्र बुझ्दै प्रमुख जिल्ला अधिकारी शालिग्राम शर्मा पौडेलले लिखित प्रतिवद्धता दिन नसकेपछि अहिंसाको प्रतिवद्धता पालना गराउन सहयोग गर्ने बताए । स्थानीयको संस्कृती संरक्षण र सम्वद्र्धनमा प्रशासनको पनि सहयोग रहने उनले जानकारी गराए ।