असार २९, गोरखा । दुई लाख लगानी गरेर २०७० सालबाट च्याउ खेती शुरु गरेका थिए उनले । शहिद लखन गाउँपालिका–६ घैरुङका नारायण बाबु थापा अहिले पनि च्याउ खेतीमै रमाइरहेका छन् । गोरखा नगरपालिका–९ लक्ष्मीबजारको शिखरमा करिव पाँच रोपनी जग्गा भाडामा लिएर च्याउ खेती शुरु गरेका उनले अहिले २० रोपनीमा खेती बिस्तार गरिसकेका छन् .

‘शुरुमा ५ शय मुढाबाट खेती शुरु गरेको थिए,’ उनले भने, ‘अहिले करिव २० हजार मुढा छ ।’ काठमाण्डौ र पोखरामा तालिम लिएर सिताके च्याउ खेती शुरु गरिएको उनले बताए । अघिल्ला बर्षसम्म एक्लै खेती गर्दै आएका उनले यस पटक भने सामूहिक रुपमा खेती थालेका छन् । लक्ष्मी सेभेन ग्रुप च्याउ कृषक समूह गठन गरेर खेती बिस्तार गरिएको उनले बताए ।

उक्त समूहले चालु आर्थिक बर्ष प्रधानमन्त्री कृषि आधुनिकीकरण परियोजना अन्तरगत गण्डकी प्रदेशबाट २५ लाख रकम अनुदान पाएको छ । ‘२५ लाख हाम्रो समूहको लगानी र २५ लाख प्रदेशको अनुदान हो, त्यसबाट हामीले डोम हाउस र टनेल निर्माण, बिउ खरिद लगायतका काम ग¥यौ,’ उनले भने । च्याउको बिउ पोखराबाट ल्याइएको उनले बताए ।

अहिले बिउ लगाउने काम भएको र कात्तिक÷मंसिरमा उत्पादन हुने उनले जानकारी दिए । उत्पादीत च्याउ स्थानीय बजारसँगै अन्य जिल्लामा पनि बिक्री हुने गरेको उनी बताउछन् । प्रति केजी पाँच सय भन्दा माथि मूल्य रहेको उनले बताए । ‘अहिले २० हजार बढी मुढामा गरेको खेतीबाट उत्पादन शुरु भएपछि दिनको एक लाख रकम सम्मको च्याउ उत्पादान हुने अपेक्षा गरेका छौ,’ उनले भने ।

अरु च्याउ भन्दा स्वादिलो हुने भएकाले सिताके च्याउ खेती तर्फ आकर्षण बढेको उनले बताए । सिताके सँगै अहिले कन्ये, राते र डल्ले च्याउ पनि खेती गरिएको उनले जानकारी दिए । लगानीमा समस्या रहेको उनको गुनासो छ । अनुदान प्रतिशत बढाउन उनले सरसकारसँग आग्रह पनि गरेका छन् ।