असोज ४, गोरखा । जिल्लाका गाईभैसीमा लम्पिस्किन रोग देखा परेको छ । पालुङटार नगरपालिका, आरुघाट र भीमसेन थापा गाउँपालिकामा यो रोग देखा परेको भेटेरीनरी अस्पताल तथा पशु सेवा बिज्ञ केन्द्र गोरखाले जनाएको छ ।

उक्त रोगसँग मिल्दोजुल्दो लक्षण देखापरेपछि गाइभैसीको एलाइजा परिक्षणका लागी नमूना संकलन गरेर पशपंक्षी रोग अन्वेषया प्रयोगशाला पोखरा पठाइएको थियो । ‘हामीले ६ वटा नमूना संकलन गरेर पठाएका थियौ,’ कार्यालय प्रमुख डा. ऋषिराम सापकोटाले भने, ‘रिपोर्ट पोजेटिभ देखियो ।’ पिसिआर परिक्षणका लागी काठमाण्डौ पठाइएको उनले बताए ।

हालसम्म २५ वटा गाइभैसीमा यो रोग देखा परिसकेको उनको भनाइ छ । गाइभैसीको शरिरमा गिर्खा आउने, ज्वरो आउने र खाना नखाने यो रोगका मुख्य लक्षण रहेको बताइएको छ । ‘यो रोग लागेपछि मुख्य गरेर गाइभैसीको दुध उत्पादन घट्छ,’ सापकोटाले भने । किर्ना र लामखुट्टेको टोकाइबाट यो रोग पशुचौपायाहरु मा सर्न सक्ने भएकाले गोठको सरसफाइमा बिशेष ध्यान दिन उनले आग्रह गरेका छन् ।

भाइरल रोग भएकाले यो रोगकै लागी भनेर औषधी उपलब्ध नभएपनि लक्षण अनुसारका औषधीहरु प्रयोग गर्न सकिने उनको भनाइ छ । ‘यो भाइरल रोग भएकाले यसको यही औषधी भन्ने छैन, तर लक्षण अनुसार ज्वरोको र खाना मन लाग्ने जस्ता औषधी दिन सकिन्छ,’ उनले भने । रोग नियन्त्रणभन्दा बाहिर नरहेको उनले बताएका छन् । गोठको सरसफाइमा ध्यान दिन सके यो रोग नियन्त्रण गर्न सकिने उनको भनाइ छ ।