गोरखा : फागुन ७ गतेबाट सातौ ‘गोर्खाली रनिङ कप’ फुटवल प्रतियोगीता शुरु हुने भएको छ । सातौ संस्करणको प्रतियोगीता फागुन ७ गतेबाट १४गते सम्म संचाल हुने आयोजक हरमटारी क्लवले जनाएको छ ।

गोरखा सदरमुकामको हरमटारी खेलमैदानमा हुने प्रतियोगीतामा राष्ट्रिय एवं स्थानीय क्लबको सहभागीता रहने छ । जिल्लाभित्र र बाहिरका गरी कुल १६ टिम प्रतियोगीतामा सहभागी हुने क्लबका महासचिव किरण ढकालले जानकारी दिए । एक टिमबाट तीन जनाभन्दा बढी बिदेशी खेलाडी खेल्न नपाउने ब्यवस्था गरिएको पनि उनले बताए । दैनिक बिहान ७ बजेदेखि ११ बजेसम्म र दिउँसो १ बजेदेखि साँझ ५ बजेसम्म खेलहरु संचालन गर्ने क्लवले जनाएको छ ।

प्रतियोगीताको उपाधी बिजेता क्लबले २ लाख २२ हजार २२२ नगद पुरस्कार पाउने छ भने उपबिजेता क्लबले १ लाख ११ हजार १११ रुपैया पाउने छ । त्यस्तै सेमिफाइनलमा पुग्ने दुवै टिमले ५० हजारका दरले नगद पुरस्कार पाउने छन् । प्रतियोगीताका सर्वाेत्कृष्ट खेलाडी, अग्रपंक्ति, मध्यपंक्ति, रक्षक, गोलरक्षक र गोलकर्ताका लागी पनि नगद पुरस्कारको व्यवस्था रहेको क्लबका अध्यक्ष जीवन गुरुङले बताए ।

प्रतियोगीता संचालनका लागी २५ लाख बढी लाग्ने अनुमान गरिएको छ । ‘हालसम्म गोरखा नगरपालिकाले चार लाख दिने भन्ने छ, हामी आयोजकले दुई लाख हाल्छौ बाँकी रकमका लागी अन्य स्रोत खोज्ने हो,’ अध्यक्ष गुरुङले भने । २०७० सालबाट शुरु गरिएको यस प्रतियोगीताले कोभिडका कारण २०७५ साल यता निरन्तरता पाउन सकेको थिएन । प्रतियोगीताले खेल मार्फत पर्यटन प्रवद्र्धन गर्ने र व्यवसायिक खेलाडी उत्पादन गर्न सहयोग पुग्ने अपेक्षा गरिएको छ ।