गोरखा ः कात्तिक शुक्ल पूर्णिमाको दिन सोमबार साँझ गोरखा सदरमुकामका नेवार समुदायले मकै सुकाउने पर्व (सकिमना) मनाएका छन् ।

घरघरबाट भुटेको मकै एकै ठाउँमा जम्मा गरेर ठुलो आँगनमा मान्द्रो बिछ्याएर जूनको प्रकाश पर्ने गरी सुकाईएर प्रसादको रुपमा ग्रहण गर्ने परम्परा रहेको छ । कात्तिक शुल्क पूर्णिमाको दिन अमृत वर्षा हुन्छ भन्ने धार्मिक मान्यता रहेको स्थानीय बताउछन् ।

भुटेको मकै सँगै भटमास, केराउ चना, लगायतका गेडागुडी, जुनेलो, बदाम, सखरखण्ड, लगायत बिभिन्न फलफुल पनि सँगै राखिन्छ । सुकाएका यी खानेकुरा प्रसादको रुपमा ग्रहण गर्ने प्रचलन छ । कतिपयले भने घरमा रहेको अन्नमा समेत मिसाउँछन् ।

घरमा भएका यी खानेकुरा पनि अमृत समान हुन्छ भन्ने विश्वास मानिन्छ । मकै सुकाउन सबैले घरघरबाट ल्याउनुपर्छ भन्ने अनिवार्य छैन । तर नेवार समुदायले यस पर्वलाई महत्वका साथ लिने भएकाले ठुलो आगन क्षेत्रका अधिकांसले लगेका थिए ।

कतिपयले भने घरैमा पनि यो पर्व मनाउने गर्छन् । लामो समय पछि २०७६ सालमा ठुलो आगनमा मकै सुकाउने पर्व मनाउन थालिएको हो । ऐतिहासिक क्षेत्र संरक्षण बिकास समितिको अगुवाईमा बाजागाजा सहित हर्षोउल्लासका साथ उत्त पर्व मनाइएको हो ।