गोरखा ः धार्चे गाउपालिका–१ हुल्चुकका ८ परिवारलाई जग्गा धनी पुर्जा प्रदानको अन्तिम तयारी गरिएको छ । राष्ट्रिय भुमि आयोग जिल्ला समिति गोरखाले शुक्रबार पत्रकार सम्मेलन मार्फत ८ जना भुमिहिनलाई जग्गा उपलब्ध गराउन नापनक्साको काम सम्पन्न भएको जानकारी गराएको हो ।

चैत १५ भित्र जग्गा धनि पुर्जा प्रदान गर्ने लक्ष्य सहित प्रक्रिया अघि बढेको जनाइएको छ । धार्चेमा १३ जना भूमिहिन सुकुम्वासीको निवेदन परेको भएतापनि ४ जना छुट दर्तामा जग्गा भएको पाइएको छ भने १ जना को आवश्यक कागजात नपुगेकाले प्रक्रिया अगाडी नवढेको जनाइएको छ । त्यस्तै शहिद लखन गाउँपालिकामा नापनक्सा सुरुवात गर्नका लागि सुचना जारी भएको राष्ट्रिय भुमि आयोग जिल्ला समितिका अध्यक्ष कमला नहर्कीले जानकारी दिइन् ।

भिमसेनथापा, बारपाक सुलिकोट र गण्डकी गाउँपालिकाको स्थानीय तहबाट जग्गा नापनक्सा प्रस्तावको तयारीमा रहेको पनि जनाइएको छ । उत्त पालिकामा नापनक्साको काम शुरु गर्ने जनाइएको छ । त्यस्तै गोरखा नगरपालिका, पालुङटार नगरपालिका र आरुघाट गाउँपालिकाको स्थानीय सहजिकरण समिति र कार्यपालिकाले प्रमाणिकरण गरेर पठाउने तयारीमा रहेको पनि उनले बताइन् ।

चुमनुव्री गाउँपालिकामा भने लगत संकलन र प्रविष्टिको काम भइरहेको भएपनि मनास्लु संरक्षण क्षेत्र भित्र पर्ने भएकाले तत्काल थप प्रक्रिया अगाडी वढाउन नसकिएको समितिले जनाएको छ । सवै पालिकामा भुमिहिन दलित, भुमिहिन सुकुम्वासी र अब्यवस्थित वसोवासीको लगत संकलनका लागि दुइ पटक सम्म ३५ दिने सुचना प्रकाशित भइसकेको छ ।

हाल सम्म ११ वटा पालिकाको १८५ जना भूमिहिन दलित, १५७ जना भूमिहिन सुकुम्वासी र ३ हजार २ सय १४ जना अब्यवस्थित वसोवासीको लगत संकलन भएको छ । लगत संकलन भएका मध्ये ३ हजार चार सय ७४ जनाको प्रणालीमा प्रविष्ट पनि भइसकेको छ ।
सिरानचोक र अजिरकोटका ८२ जनाको भने प्रणालीमा प्रविष्ट हुन वाँकी रहेको उनले जानकारी दिइन् ।