गोरखा : आगामी प्रतिनिधिसभा निर्वाचनका लागि गोरखामा व्यापक तयारी गरिएको छ । फागुन २१ गते हुने निर्वाचनका लागि जिल्लाका दुई निर्वाचन क्षेत्रमा ३३३ मतदान केन्द्रमार्फत मतदान सञ्चालन गरिने भएको छ। तीमध्ये ३३१ नियमित र २ अस्थायी मतदान केन्द्र रहेका छन् ।

जिल्ला निर्वाचन कार्यालयका अनुसार कुल १९९२ जना मतदान कर्मचारी परिचालन गरिनेछन्। प्रत्येक नियमित मतदान केन्द्रमा ६ जनाका दरले कर्मचारी खटाइनेछन् भने अस्थायी मतदान केन्द्रमा ३ जनाका दरले कर्मचारी रहने व्यवस्था मिलाइएको छ ।

नियमित केन्द्रमा एक मतदान अधिकृत, एक सहायक मतदान अधिकृत, तीन सहायक कर्मचारी तथा एक कार्यालय सहयोगी रहनेछन्। कर्मचारी व्यवस्थापनको काम मुख्य निर्वाचन अधिकृतको कार्यालयमार्फत सम्पन्न भइसकेको जनाइएको छ ।

जिल्ला समन्वय समिति र कारागार कार्यालयमा अस्थायी मतदान केन्द्र स्थापना गरिएको छ। कारागार केन्द्रमा २० कैदीबन्दी र १० कर्मचारी गरी ३० जनाले मतदान गर्नेछन् भने जिल्ला समन्वय समितिको केन्द्रमा ९५१ कर्मचारीले मतदान गर्ने व्यवस्था छ ।

छनोट गरिएका मतदान अधिकृत तथा अन्य कर्मचारीलाई आवश्यक तालिम प्रदान गरी सम्बन्धित केन्द्रमा पठाइनेछ। नियमित मतदान केन्द्रमा खटिने कर्मचारीले सोही केन्द्रबाट मतदान गर्न पाउनेछन् भने कैदीबन्दी र कर्मचारीले समानुपातिकतर्फ मात्र मतदान गर्न पाउने व्यवस्था गरिएको छ ।