जिल्लामा भएका बिकास निर्माणका कामहरुमा ठेकेदारको लापरवाहीले सिमा नाघेको छ । भौतिक संरचना निर्माण होस् वा सडक मर्मत, ठेकेदारको लापरवाही छर्लङ्ग देखिन थालेको छ । एकातर्फ ठेकेदारको लापरवाही अर्कातर्फ नियमन निकायको फितलो अनुगमन । दुवैको अवस्था हेर्दा लाग्छ नियमन निकाय र ठेकेदारकै मिलेमतोमा बिकास निर्माणका काममा लापरवाही भइरहेका छन् । जिल्लामा भएको बिकास निर्माणको काममा लापरवाही गर्ने ठेकेदार कारवाहीका भागेदार हुन् । कारवाही हुनुपर्छ । नियमन निकायको प्रभावकारी अनुगमन पनि आवश्यक छ ।
भूकम्प पश्चात जिल्लामा बिकास निर्माणका कामले तिव्रता पाएकै छन् । सडक कालोपत्रे हुने देखि स्तरोन्नतीका काम भइरहेका छन् । भौतिक संरचनाहरु निर्माण हुदै छन् । गाउँगाउँमा सडक पुगेको छ । मोटरेवल पुलहरु पनि निर्माण भइरहेकै छन् । बिकासको लहर छाउँदै  छ । तर तिनै बिकास निर्माणका काममा भएको लापरवाहीले समस्या निम्त्याइरहेको छ । बारपाक सुलिकोट गाउँपालिकाको स्वाँरा सौरपानी सडकखण्डमा भइरहेको सडक कालोपत्रेको काम गुणस्तरहीन भएको भन्दै स्थानीय आन्दोलनमै उत्रिएका छन् । बनेका नाला र कल्वर्डहरु पनि भत्किएका छन् । त्यस्तै फिनाम घ्याम्पेशाल सडकखण्डमा भएको कालोपत्रे केही दिनमै उप्कियो । त्यहा पनि ठेकेदारको लापरवाही प्रष्ट देखिन्छ । कतिपय योजना सम्पन्न हुनुपर्ने समयसिमा सकिएपनि अलपत्र अवस्थामा छन् । कालोपत्रे भइसक्नुपर्ने १२ किलो बारपाक सडकखण्डको काम अलपत्र छ । घ्याल्चोकमा रहेको तुइन बिस्थापित गर्नका लागी मोटरेवल पुल निर्माणको कामको हालत पनि उस्तै छ ।
यी त उदाहरण मात्र हुन् । जिल्लाका धेरै बिकास निर्माणका कामहरुको अवस्था यस्तै छ । ठेकेदारको लापरवाहीले समस्या निम्तिरहेको छ । त्यसमाथि नियमन निकायको फितलो अनुगमनले काम नगर्ने ठेकेदारलाइ प्रश्रय मिलिरहेको छ । त्यसैले बिकास निर्माणका काममा लापरवाही गर्ने ठेकेदारालाइ कारवाही हुनु जरुरी छ साथै अनुगमनलाइ नियमित र प्रभावकारी बनाउनु आवश्यक देखिन्छ ।