गोरखा ः जिल्लामा भूकम्पपछिको पुननिर्माण तथा नीतिगत विषयमा छलफल भएको छ ।
ट्रान्सपरेन्सी इन्टरनेशन नेपालको आयोजनामा बिहीबार जिल्लाको पुननिर्माणको अवस्था, कार्यप्रगति र नीतिगत समस्याका विषयमा छलफल भएको हो ।

कार्यक्रममा  राष्ट्रिय पुनर्निर्माण प्राधिकरण जिल्ला आयोजना कार्यान्वयन इकाइ अनुदान व्यवस्थापन तथा स्थानीय पूर्वाधार कार्यालयका प्रमुख रामशरण आचार्यले जिल्लामा भूकम्पपछिको नीजि आवासको प्रगति वितरण प्रस्तुत गरेका छन् ।

---

---

जिल्लामा हाल सम्म ८५ प्रतिशत नीजि आवास पुननिर्माण सम्पन्न भएको उनले बताए । त्यस्तै जिल्ला आयोजना कार्यान्वन इकाइ (भवन) की प्रमुख सुनिता श्रेष्ठले जिल्लाका सरकारी भवन, र स्वास्थ्य संस्थाको हाल सम्मको प्रगति वितरण प्रस्तुत गरेकी छिन् ।

जिल्लामा निर्माण भएको  सरकारी भवनहरु मध्ये तीन वटा भवनको निर्माण सम्पन्न भइसकेको र ६ वटा भवन निर्माणको अन्तिम चरण पुगेको उनले बताइन् ।

जिल्ला आयोजना कार्यान्वय इकाइ शिक्षाका प्रमुख विष्णु प्रसाद मित्रले भुकम्प पछिको विद्यालय पुननिर्माण अवस्थाको प्रगति    विवरण प्रस्तुत गर्दे हाल सम्म २ सय ९० विद्यालय पुननिर्माण भइसकेको जानकारी गराए । अन्य विद्यालयहरु पुननिर्माण भइरहेको उनले बताए ।

कार्यक्रममा बोल्ने अधिकांशले नीतिगत व्यवस्था भएपनि कार्यान्वयन नहुदा समस्या आएको र भूकम्पपछिको पुननिर्माणमा दक्ष प्राविधिको अभाव हुनु र गुणस्तरहीन सामानको प्रयोग भएको गुनासो गरे । ट्रान्सपरेन्सी इन्टरनेशन नेपालका अध्यक्ष   खेमराज रेग्मीको अध्यक्षतामा भएको कार्यत्रममा प्रमुख अतिथि जिल्ला समन्वय समितिकी उपप्रमुख जानुका अधिकारी,  गोरखा नगरपालिकाकी उपमेयर विना कुमारी श्रेष्ठ लगायतले  धारणा राखेका थिए ।

जिल्लामा भूकम्प पछिको पुननिर्माणको काम अपेक्षा अनुसार नभएको र पारदर्शीता समेत नभएको कार्यक्रमका सहभागीहरुले बताएका थिए ।