गोरखा ः  कांग्रेस गोरखाले आज बाट दोस्रो चरणको राष्ट्रिय जागरण अभियान शुरु गर्ने भएको छ ।
दोस्रो चरणको अभियान बीपी कोइरालाको जन्मजयन्ती पारेर  सुरु गर्न लागेको हो ।

जागरण अभियानमा कांग्रेसले पहिलो  चरणमा जस्तै यस पटक पनि पार्टी सुदृढीकरण, समसामयिक          राजनीति, जनजीविकाका सवाल, सुशासन लगायतका मुद्दालाई नै उठाउने भएको छ । पहिलो     चरणको जागरण अभियान एक महिना चलेको भए पनि दोस्रो  चरणको अभियान भने कांग्रेसले १५ दिनमा सक्दैछ ।

---

---

मंगलबारदेखि सुरु हुने अभियान असोज ७ गते सम्पन्न हुने पार्टीका सचिव नन्द प्रसाद न्यौपानले बताए । अभियान अन्तर्गत चार वटै प्रदेशसभा निर्वाचन क्षेत्रमा कार्यक्रम हुनेछन् । अभियानको पहिलो दिन कांग्रेसले चार वटै प्रदेश सभा निर्वाचन क्षेत्रमा पर्यावरण रक्षाका लागि नयाँ सन्देश पनि दिन लागेको छ ।

यस पटक कांग्रेसले अभियानको उद्घाटन नै वृक्षारोपण गरेर गर्न लागेको हो । बिपी कोइरालाको १०६ औँ जन्मजयन्तीका दिन          पारेर अभियान सुरु गर्न लागेकाले प्रत्येक  प्रदेश सभा निर्वाचन क्षेत्रले १ सय ६ वटै विरुवा निश्चित स्थलमा वृक्षारोपण गर्ने तयारी             छ ।

प्रतिनिधि सभा निर्वाचन क्षेत्र नम्वर १ को प्रदेश निर्वाचन क्षेत्र नम्वर क मा गोनपा–५ को पश्चिमकाली, सोहि क्षेत्रको  प्रदेश ख मा भिमसेन थापा गापाको घ्याम्पेशाल र दुइ नम्वर निर्वाचन क्षेत्र नम्वरको प्रदेश सभा क निर्वाचन क्षेत्रको पालुङटार र ख को अजिरकोट गापाको भच्चेकमा वृक्षारोपण गरि जागरण अभियान शुरु हुने कांग्रेसले जनाएको छ ।
कांग्रेसले यो पटकको अभियानमा सामाजिक विकृतिका मुद्दालाई पनि उठाउने बताएको छ ।