केही दिन अघिको अविरल बर्षाका कारण जिल्लाको कृषि क्षेत्रमा समेत क्षति पुगेको छ ।
करिव २५ सय रोपनी क्षेत्रफलको धान खेती नष्ट भएको कृषि ज्ञान केन्द्रले जनाएको हो ।

‘अविरल बर्षाका कारण नदिमा आएको बाढीले धेरैजसो खेत वगर बनाएको छ,’ केन्द्रकी प्रमुख मनिता थापाले भनिन्, ‘अहिलेसम्म हामीलाई प्राप्त तथ्याङ्क यो हो तर क्षति विवरण अझै आउन बाँकी छ ।’

---

---

पालुङटार नगरपालिका–९ र गोरखा नगरपालिका–४ मा रहेका करिव ४ हजार कफिको विरुवा समेत नष्ट भएको उनले बताइन् । ‘धार्चे र बारपाक सुलिकोट गाउँपालिका गरी करिव ८० रोपनी क्षेत्रफलमा लगाइएको कोदो र मकै खेतिमा पनि क्षति पु¥याएको छ,’ उनले भनिन् ।

शहिद लखन गाउँपालिका रामशाहघाटमा रहेको हाट बजारको संरचनामा समेत क्षति पुगेको उनको भनाइ छ । ‘संरचनाको जगको केही अंश बगाएको रहेछ, त्यसले गर्दा अन्य टहराहरु जोखिममा छन्,’ उनले भने ।

अविरल बर्षाकै कारण ६ वटा कुलोमा समेत क्षति पुगेको उनले बताइन् । उनका अनुसार भीमसेन थापा र शहिद लखन गाउँपालिका तथा पालुङटार नगरपालिकामा रहेका स्थायी कुलोमा क्षति पुगेको हो ।

क्षतिको अन्य विवरण अझै आउन बाँकी रहेको उनले बताइन् । ‘स्थानीय सरकार र प्रशासनबाट पनि क्षति विवरण मगाएका छौ, विवरण आएपछि क्षतिपूर्तीका लागी गण्डकी प्रदेशको भूमी व्यवस्था, कृषी तथा सहकारी मन्त्रलाय पठाउछौ,’ उनले भनिन् ।

क्षतिपूर्तीका लागी प्रहरी प्रशासन र स्थानीय तहबाट मुचुल्का उठाएर वडा वा स्थानीय तहको सिफारिस सहित कार्यालयमा बुझाउन पनि उनले आग्रह गरेकी छिन् । मन्त्रालयले क्षतिपूर्तीका लागी आवश्यक तयारी गरिरहेको उनले जानकारी दिइन् ।