जनता समाजवादी पार्टीका नेता डा. बाबुराम भट्टराईले पछिल्लो समय गोरखाको बिकास सुस्ताएको बताएका छन् ।
वुधवार जिल्लाका पत्रकारहरुसँग कुराकानी गर्दै उनले आफू अर्थमन्त्री हुदाँ ट्र¥याक खोलिएका सडकहरु हालसम्म पनि कालोपत्रे हुन नसकेको भन्दै चिन्ता व्यक्त गरे ।

‘म अर्थमन्त्री हुदाँ गोरखाको पूर्वाधार बिकासमा सडक नै पहिलो हो भनेर पूर्व पश्चिम जोड्ने कोरिडोर बिकास गर्ने योजना सहित ट्र¥याक खोल्न शुरु गरे,’ उनले भने, ‘तर अहिलेसम्म ती सडकहरु पिच भएका छैनन् ।’ राजनितिक नेतृत्व, प्रशासन र ठेकेदारको मिलेमतोका कारण पूर्वाधार क्षेत्रमा काम हुन नसकेको उनले बताए ।

---

---

‘समयमै काम नगर्ने ठेकेदारलाइ कार्यालय प्रमुखले स्पष्टीकरण लिएर टर्मिनेट गर्न सक्ने अधिकार हुन्छ, तर उनीहरुले त्यस्तो गर्दैनन्, गर्न खोजे राजनितिक दलको दवावमा उसको सरुवा हुन्छ,’ उनले भने ।

बाह्र किलो भालुस्वाँरा बारपाक सडक कालोपत्रे कामको उदाहरण दिदै उनले भने, ‘यसअघि नै कालोपत्रे भइसक्नुपर्ने उक्त सडकखण्डमा अझै काम सकिएको छैन, कालोपत्रे भएको ठाउँमा पनि अक्षता छरेजस्तो अलिकति गिटी र अलिकति अलकत्रा छरेर झाटारेको छ ।’ अनुगमन गर्ने र ताकेता लगाउने काम सम्बन्धित कार्यालय प्रमुखको भएपनि वेवास्ता गरिएको उनले बताए ।

राजनितिक प्रसँग जोडदै भट्टराइले प्रधानमन्त्री केपी शर्मा ओलीको नेतृत्वमा देश चरम निरंकुशतातिर गएको बताए । यो विपक्षीहरुले लगाएको आरोप मात्र नभई सत्तारुढ नेपाल कम्युनिस्ट पार्टी चलेको बहसले पुष्टि गर्ने उनको भनाइ छ ।

प्रधानमन्त्री ओलीले संसद विघटन गर्ने, आपतकाल घोषणा गर्ने र देशलाई ज्ञानेन्द्र शाहको कदमतिर लैजाने कदम चालेका कारण अन्तरविरोधलाई टालटुल पार्ने काम भएको सूचना आफूले पाएको उनले बताए ।

पत्रकारसँग कुराकानी गर्दै उनले भने, ‘यसरी देश कहिलेस्म्म चल्न सक्छ ?’ अहिले पनि लोकतन्त्र सुरक्षित नभएको र देश निरंकुशतावादीको बन्धक बनेको उनको दाबी छ ।

कोरोना भाइरस नियन्त्रणका लागि सरकारले ठोस काम गर्न नसकेको तर विना योजनाको लकडाउनले अर्थतन्त्र चौपट भएको भट्टराईले बताए ।

‘उद्योगधन्दा, व्यवसाय सबै चौपट छन्, श्रमिकहरु रोएर बसेका छन्, तर सरकारले समस्या समाधानका लागी ठोस निति योजना ल्याउन सकेको छैन,’ उनले भने ।

जिल्लाको बिकास निर्माणका कामहरु जिम्मा लिएका ठेकेदारहरुसँग भट्टराइले वुधवार अन्तरक्रिया समेत गरेका छन् । छलफलको क्रममा ठेकेदारहरुले निर्माण सामग्री अभाव, लक डाउन जस्ता समस्या तेस्र्याएका थिए । पत्रकार भेटघाटकै क्रममा भट्टराइले उपेन्द्र देवकोटाद्धारा लिखित ‘लक डाउनलाई झ्यालबाट नियाल्दा’ नामक पुस्तकको बिमोचन समेत गरेका छन् ।