कोरोना संक्रमणको जोखिम न्यूनिकरणका लागी जिल्लामा १४ वटा कन्ट्याक्ट लेस ह्याण्ड वासिङ स्टेशन निर्माण गरिएको छ ।
युनिसेफको आर्थिक सहयोग र कोसडर गोरखा नामक गैर सरकारी संस्थाको प्राविधिक सहयोगमा स्टेशन निर्माण गरिएको हो ।

आरुघाट गाउँपालिकामा मात्रै ७ वटा स्टेशन निर्माण गरिएको कोसडरका कार्यकारी निर्देशक काजिराम रोकाले बताए । क्वारेन्टिन स्थल बनाइएका क्षेत्रमा उक्त स्टेशन राखिएको बताइएको छ ।

---

---

गोरखा अस्पताल अन्तरगत रहेको गोरखा क्याम्पसको आइसोलेसनमा तीन वटा स्टेशन राखिएको रोकाले जानकारी दिए ।

‘गोरखा नगरपालिका वडा नम्वर ७ डण्डीडाँडामा रहेको नवज्योती माविमा पनि खुट्टाले हात धुन मिल्ने गरी स्टेशन निर्माण गरिसकेका छौ, शहिद लखन गाउँपालिकामा तीन वटा दिने तयारी भइरहेको छ,’ उनले भने । यूनिसेफको आर्थिक सहयोगमा गण्डकी प्रदेशभर हालसम्म ४९ वटा स्टेशन निर्माण गरिसकेको उनले बताए ।

‘उक्त स्टेशनमा खुट्टाको प्रयोग गरेर हात धुन सकिन्छ, त्यसले गर्दा कोरोना संक्रमणको जोखिमलाई न्यूनिकरण गर्छ भन्ने अपेक्षा लिएका छौ,’ रोकाले भने । स्टेशन निर्माण भएका स्थानमा मास्क, सेनिटाइजर, पन्जा लगायतका स्वास्थ्य सामग्री पनि वितरण गरिएको बताइएको छ ।