लक डाउन पछि गोरखा दरवार पुननिर्माणको कामले तिव्रता पाएको छ ।
दोस्रो तलाको काम अन्तिम चरणमा पुगेको दरवार हेरचाह अड्डाले जनाएको छ ।

‘दोस्रो तलामा झ्याल ढोका राखिसक्यो, गारोको काम अन्तिम चरणमा पुगेको छ,’ अड्डा प्रमुख हरि भुषालले भने, ‘गारोको काम सकिएपछि माथि वाल प्लेट लगाएर दलिनको काम हुन्छ ।’

---

---

नियमित काम भए अवको एक सातामा दोस्रो तलाको काम सम्पन्न हुने उनले बताए । उनका अनुसार दोस्रो तलाको पूर्व पश्चिमको गारोको काम सम्पन्न भइसकेको छ ।

दक्षिण तर्फको गारोको काम सकिने अवस्थामा रहेको र उत्तर तर्फको काम भइरहेको उनले जानकारी दिए । अहिले करिव १४ जना कामदार नियमित काममा खटिएका छन् ।

‘लक डाउन पछि काम गर्ने कामदारको पनि अभाव भएको छैन, काम धमाधम भइरहेको छ, अहिलेको कामको अवस्था सन्तोषजनक नै छ,’ कार्यालय प्रमुख भुषालले भने ।

तर निर्धारित समयमा काम सक्नेमा भने अन्योल रहेके उनले बताए । दरवार पुनर्निर्माणका लागि पचली भैरव सिभाको जेभीसँग २०७४ साल कात्तिक २९ गते ठेक्का सम्झौता भएको हो । सम्झौता अनुसार २०७६ साल मंसिर मसान्तभित्र काम सक्नुपर्ने थियो । तर तोकिएको समयमा काम सम्पन्न नभएपछि २०७७ जेठ मसान्त सम्मका लागि म्याद थप भयो ।

थप गरिएको समयमा पनि ठेकेदारले काम सम्पन्न नगरेपछि पुनः मंसिर मसान्तसम्मका लागि म्याद थप गरिएको छ । तर पछिल्लो पटक थप भएको समयमा पनि काम सम्पन्न हुनेमा आशंका रहेको कार्यालय प्रमुख भुषाल बताउछन् ।

‘अव दशै लाग्यो कामदार घर पक्कै जान्छन्, त्यसैले तोकिएकै समयमा काम सक्न मुश्किल नै देखिन्छ,’ उनले भने ।