जिल्ला ट्राफिक कार्यालय गोरखाले चालु आर्थिक बर्षको पाँच महिनामा १३ लाख राजश्व संकलन गरेको छ ।
साउन देखि मंसिर महिनासम्म १३ लाख राजश्व संकलन भएको कार्यालयले जनाएको छ । गत आर्थिक बर्षको तुलनामा कम राजश्व उठेको जिल्ला ट्राफिक प्रमुख मित्रलाल ढकालले बताए ।

‘गत आर्थिक बर्षको मंसिर मसान्तसम्म हामीले करिव २५ लाख राजश्व संकलन गरेका थियौ,’ उनले भने, ‘तर यो बर्ष १३ लाख मात्र उठेको छ ।’ कोभिड–१९ का कारण धेरै सवारी साधन नचल्दा राजश्व कम उठेको उनको भनाइ छ । ‘कोरोनाले गर्दा धेरै सवारी पनि गुडेनन्, फेरी यात्रु पनि कम हुदा सवारी पनि कम चल्यो,’ उनले भने ।

---

---

चालु आवको मंसिर महिनासम्म सवारी नियम उल्लघंन गर्ने २ हजार ५० सवारी साधन कारवाहीमा परेको उनले बताए । उनका अनुसार सबै भन्दा धेरै मोटरसाइकल चालक कारवाहीमा परेका छन् । उनीहरुबाट मात्रै ४ लाख ७५ हजार राजश्व संकलन भएको कार्यालयले जनाएको छ ।

ट्रक÷टिपर कारवाहीबाट एक लाख ८६ हजार, बसबाट एक लाख ७६ हजार र ट्याक्टरबाट २ लाख ७० हजार राजश्व संकलन भएको कार्यालय प्रमुख ढकालले बताए ।

चालु आवको मंसिर मसान्तसम्म जिल्लामा पाँच वटा सवारी साधन दुर्घटना भएको छ । दुर्घटनामा परि ३ जनाको मृत्यु भएको छ भने ७ जना गम्भिर घाइते भएका छन् ।

चालु आवको तुलनामा गत आव दुर्घटना संख्यामा कमी भएको बताइएको छ । सवारी दुर्घटना न्यूनीकरणका लागि विद्यालय, समुदायमा जनचेतनामुलक कार्यक्रमहरु संचालन गर्दै आएको कार्यालयले जनाएको छ ।