पर्यटन प्रवद्र्धन गर्ने उदेश्यका साथ धार्चे पर्यटन महोत्सव–२०७७ हुने भएको छ ।
धार्चे गाउँपालिकामा यही माघ १५ गतेबाट महोत्सव गर्न लागिएको आयोजक धार्चे पर्यटन प्रवद्र्धन समितिले मंगलवार पत्रकार सम्मेलन गरी जनाएको छ ।

२५ गतेसम्म संचालन हुने महोत्सवमा सांगितिक कार्यक्रमसँगै बिभिन्न साहसिक खेलहरु पनि हुने समिति अध्यक्ष मणी गुरुङले बताए । गाउँपालिकाको वडा नम्वर ३ तातोपानीबाट माछाखोलासम्म हुदै खानेवेशी वगरसम्म ¥याफ्टिङ संचालन हुने उनले जानकारी दिए ।

---

---

‘वडा नम्वर ७ को नौलीखोलामा २० र १० मिटरको दुई खण्डमा क्यानोनिङ संचालन हुन्छ,’ उनले भने, ‘वडा नम्वर ६ काशिगाउँ वेशीमा १५ र १२ मिटरको रक क्लाइम्बिङ संचालन गर्छाै ।’

वडा नम्वर ३ खोर्लावेशीमा ५० मिटर दुरीको जीपलाइन खेल समेत संचालन हुने उनले बताए । साहसिक खेल पश्चात नौली खोला बगरमा रात्री वासको लागी ‘बिच क्याम्पिङ’ को समेत व्यवस्था गरिएको आयोजकले जनाएको छ ।

महोत्सवमा धार्चे गाउँपालिका भित्रको पर्यटकिय गन्तव्यहरुको भिडियो समेत प्रद्धर्शन गरिने बताइएको छ ।

महोत्सवले धार्चेमा रहेको पर्यटकिय गन्तव्यहरुको पहिचान तथा प्रचार प्रसारमा समेत सहयोग पुग्ने अपेक्षा गरिएको छ ।

महोत्सव गर्नका लागी करिव १८ लाख खर्च लाग्ने अनुमान आयोजकको छ । दैनिक तीन सय देखि पाँच सय दर्शकले महोत्सवको अवलकोन गर्ने अपेक्षा गरिएको गुरुङले बताए ।