गोरखा : गण्डकी प्रदेशले ल्याएको दुध उत्पादनमा आधारित प्रोत्साहन सहयोग कार्यक्रमका लागी जिल्लामा एउटा पनि आवेदन परेन ।
भेटेरिनरी अस्पताल तथा पशु सेवा विज्ञ केन्द्रले गत असोज २५ गते १५ दिने सूचना जारी गर्दै दुग्ध सहकारीसँग आवदेन माग गरेको थियो । तर कुनै पनि सहकारीबाट आवेदन नपरेपछि पुनः सूचना जारी गर्ने तयारी कार्यायलले गरेको छ । प्रदेश सरकारको भूमी ब्यवस्था, कृषि तथा सहकारी मन्त्रालयले यो वर्षबाट दुध उत्पादनको आधारमा किसानलाई अनुदान दिने कार्यक्रम तय गरेको हो । दैनिक २ शय लिटरसम्म दुध संकलन र बिक्री गर्ने सहकारी मार्फत किसानलाई एक लिटरमा साढे दुई रुपैयाँका दरले अनुदान दिने गरि उक्त कार्यक्रम तय भएको कार्यालयका सूचना अधिकारी महेन्द्र पौडेलले बताए । उक्त कार्यक्रम संचालनका लागि चालु आर्थिक वर्ष ४५ लाख रुपैयाँ विनियोजन भएको उनले जानकारी गराए । कार्यक्रम संचालन मापदण्ड २०७७ अनुसार दुध उत्पादनमा संलग्न किसानलाई प्रोत्साहन गर्दै उत्पादन बढाउनका लागि अनुदान कार्यक्रम ल्याइएको हो । तर जिल्लामा दुध उत्पादन र बिक्री गर्ने सहकारी कम भएकाले अनुदानका लागि आवेदन नपरेको भेटेरिनरी अस्पताल तथा पशु सेवा विज्ञ केन्द्रले जनाएको छ । ‘जिल्लामा गोरखा नगरपालिका वडा नम्वर १४ याङकोट र आरुघाटमा गरी दुई वटा मात्र दुग्ध सहकारी रहेछन्, तर उनीहरुले पनि आवेदन हालेनन्,’ कार्यालयका सूचना अधिकारी पौडेलले भने । दोस्रो पटकको सूचनामा पनि आवेदन नपरे रकम फ्रिज भएर जाने उनले बताए ।