चैत, ४ गोरखा : गोरखा नगरपालिका–१० छेवेटारमा च्याउ खेती गरिएको टनेलमा आगलागी भएको छ ।

स्थानीय सिता दराइले कन्ये च्याउ खेति गरेको टनेलमा आइतवार राती आगलागी भएको हो । आगलागीका कारण करिव १५ लाख बराबरको क्षति भएको उनले बताइन् । ‘टनेल भित्र डोम हाउस बनाएर च्याउ उत्पादन गरेको थिए,’ उनले भनिन्, ‘बेच्ने भेला भइसकेको थियो, तर आगलागी भएर सबै नष्ट भयो ।’ उत्पादन भएको करिव ५ हजार किलो च्याउ जलेर नष्ट भएको उनले बताइन् । आगलागीका कारण दुइ लाख ५० हजार खर्चेर निर्माण गरिएको डोम हाउस र टनेल पूर्ण रुपमा जलेको छ । २०६५ सालबाट च्याउ खेती गर्दै आएकी दराइले भूकम्प पश्चात उक्त पेशा छाडेर सामान्य किराना पसल संचालन गर्दै आएकी थिइन् ।

परिवार पाल्न समस्या भएपछि गत माघ महिनाबाट उनले पुनः च्याउ खेती शुरु गरेकी हुन् । तर बेच्ने बेला भएको च्याउ आगलागीले नष्ट पारेपछि उनी चिन्तित छिन् । ‘श्रीमान आखा देख्नुहुन्न, छोराहरु पढ्दै छन्, आम्दानीको स्रोत नभएर च्याउ खेती गरेको, त्यो पनि सकियो, अव कसरी परिवार पाल्ने ?’ उनले गुनासो गरिन् । सुनियोजित रुपमा कसैले आगजनी गरिदिएको उनको दावी छ । आगजनी बारे सम्बन्धित वडा र प्रहरी चौकीमा खवर गरेको उनले बताइन् ।