गोरखा चैत्र, २३ नियम विपरित यात्रु बोक्ने रातो प्लेटका सवारी साधनलाइ कारवाही गर्न माग गरिएको छ ।जिल्लामा ट्याक्सी सेवा संचालन गर्दै आएको गोरखा मनकामना यातायात सेवा प्रालिले कारवाहीका लागी ट्राफिक कार्यालयसँग माग गरेको हो ।

प्रालिले बिभिन्न ठाउँमा सेवा दिदै आएपनि नीजि कार तथा जिपले नियम विपरित व्यवसाय नै धरापमा पार्ने गरी भाडामा यात्रु ओसार पसार गरेको प्रालिले जनाएको छ । नियम विपरित भाडामा यात्रु बोक्ने नीजि सवारीलाइ कारवाही गर्न भन्दै प्रालिले जिल्ला ट्राफिक कार्यालयलाई निवदेन समेत बुझाएको छ । कारवाहीमा ट्राफिक कार्यालयले वेवास्ता गरेको गुनासो उनीहरुले गरेका छन् ।

‘नीजि सवारीहरु ठाउँठाउँमा यात्रु कुरेर बस्छन्, अनि भाडामा यात्रु बोक्छन्, ट्राफिकले भने वास्ता गर्दैन,’ प्रालिका एक पदाधिकारीले भने । ट्राफिक कार्यालयले भने चेकजाँचमा कडाइ गरिएको र नियम विपरित यात्रु ओसार्ने सवारी भेटेमा कारवाही गरिएको जनाएको छ । ‘हामी बिभिन्न ठाउँमा छड्के चेकजाँच गरिरहेका छौ, नियम विपरित यात्रु बोकेको निजी सवारीलाइ कारवाही पनि गरिरहेका छौ,’ जिल्ला ट्राफिक इन्चार्ज मित्रलाल ढकालले भने । नियम विपरित यात्रु बोकेको जानकारी भएमा ट्राफिकलाइ खवर गर्न पनि उनले आग्रह गरेका छन् ।