गोरखा जिल्लाका तीन हजार भन्दा बढि भूकम्पपीडित लाभग्राही प्रवलिकरणको सूचिबाट पूर्ण लाभग्राही कायम भएका छन् । राष्ट्रिय पुनर्निर्माणप्राधिकरणले जिल्लाका तीन हजार २ सय १४ लाभग्राहीलाई प्रवलिकरणबाट पुनर्निर्माण लाभग्राही कायम गरेको हो ।

प्राधिकरणको फागुन २८ र पुष १९ गतेको छुट्टाछुट्टै बैठकले जिल्लाका लाभग्राहीको गुनासो फर्छौट गरेको जिल्ला आयोजना कार्यान्वयन इकाई अनुदान ब्यबस्थापन तथा स्थानीय पुर्वाधार इकाई (जिमाली) ले जनाएको छ । जिल्लामा प्रवलीकरणका ५ हजार ७ सय ४४ लाभग्राहीमध्ये करीब ४ हजारले पुनर्निर्माण लाभग्राही कायम हुनका लागि आवेदन दिएका थिए ।

त्यसमध्ये हालसम्म तीन हजार २ सय १४ जनाको गुनासो फर्छौट भएको हो । प्राधिकरणमा केहि गुनासो फर्छौटकै प्रक्रियामा पनि रहेकाले संख्या थपिन सक्ने जिमालीले जनाएको छ । प्राधिकरणबाट प्राप्त विवरण अनुसार जिल्लामा सबैभन्दा धेरै गोरखा नगरपालिकाका लाभग्राही प्रवलीकरणबाट पुनर्निर्माण लाभग्राहीमा थपिएका छन् ।

गोरखा नगरपालिकाको ७ सय ११, पालुङटार नगरपालिकाको ५ सय ८०, आरुघाट गाउँपालिकाको १ सय ३३, अजिरकोट गाउँपालिकाको ४६ र भिमसेन थापा गाउँपालिका को १ सय ७० लाभग्राही प्रवलीकरणबाट पुनर्निर्माणमा परिवर्तन भएका हुन् । यस्तै चुमनुब्री गाउँपालिकाको २१, धार्चे गाउँपालिकाको ७३, गण्डकी गाउँपालिकाको २३४, शहिद लखन गाउँपालिकाको ५ सय ३८, सिरानचोक गाउँपालिकाको ६ सय २ र बारपाक सुलिकोट गाउँपालिकामा एक सय ४ लाभग्राही प्रवलिकरणबाट पुनर्निर्माण लाभग्राही कायम भएका हुन् ।

लाभग्राही परिवर्तन भएसँगै जिल्लामा पुनर्निर्माण लाभग्राहीको संख्या ७२ हजार ८ सय २५ कायम भएको छ भने प्रवलीकरण लाभग्राहीको संख्या दुई हजार ५ सय ३० मा झरेको छ । लाभग्राही परिवर्तन भएकाहरुले प्राविधिकसँग समन्वय गरेर संरचना निर्माण तथा किस्ता भुक्तानीका लागि प्रक्रिया सुरु गर्न सक्नेछन् । उनिहरुले प्रबलिकरण गरेर पनि घर बस्नयोग्य नहुने भन्दै पुनर्निर्माण लाभग्राहीमा सूचीकृत हुन माग गरेका थिए ।

सरकारले भूकम्पले क्षति पुगेको घर प्रबलीकरणका लागि १ लाख र पुनर्निर्माणका लागि ३ लाख रुपैयाँ अनुदान दिएको छ । एक लाख रुपैयाँ बुझिसकेका तर प्रवलिकरणबाट पुननिर्माणमा परिवर्तन भएका लाभग्राहीहरुले अब सुरक्षीत रुपमा भूकम्पप्रतिरोधी घर बनाएपछि थप २ लाख रुपैयाँ पाउनेछन् ।