गोरखा ः मनकामना मन्दिर र गोरखा दरवारमा भक्तजनहरुले पुजापाठ गर्न नपाउने भएका छन् । जिल्ला स्तरिय कोभिड–१९ संकट व्यवस्थापन केन्द्रको मंगलवारको बैठकले बैशाख मसान्त सम्मका लागी धार्मिक स्थलमा पुजाआजा गर्न रोक लगाउने निर्णय गरेको छ । कोरोना संक्रमणको जोखिम न्यूनिकरणका लागी गरिएको उक्त निर्णय बिहीवारबाट लागू गरिने मनकामनाका मूल पुजारी इन्सान थापा मगरले बताए ।

‘भोलीबाट मन्दिर बन्द गर्ने भनेर मनकामना क्षेत्र बिकास समितिले पनि निर्णय गरिसक्यो,’ उनले भने, ‘मन्दिरको ढोका बन्द गर्छाै, नृत्य पुजा मात्र हुन्छ ।’ मन्दिर बन्द भएपनि केवलकार र सवारी संचालन हुदा भक्तजन आउने सम्भावना रहेको उनले बताए । ‘केवलकार र सवारी चल्ने, होटलहरु खुल्ने हुदाँ भक्तजनहरु आउछन्, भीडभाड हुन्छ, कसरी नियन्त्रण गर्ने भन्ने समस्या छ,’ उनले भने । यसअघि मन्दिर बन्द भएपनि बाहिरबाटै पुजाआजा गर्ने र बली दिने काम समेत भएको हुदाँ समस्या भएको उनले बताए ।

गोरखा दरवार पूर्ण रुपमा बन्द गर्ने वा नगर्ने भन्नेमा अन्योल रहेको गोरखा दरवार हेरचाह अड्डाले जनाएको छ । ‘प्रशासनको निर्देशन आएपछि बन्द गर्नुपर्छ, तर भीडभाड नगरी पुजाआजा गर्ने व्यवस्था मिलाउन सकिन्छ की भन्ने बारेमा भोली पुजारी र सुसारेहरु प्रमुख जिल्ला अधिकारीसँग छलफल गर्न जादैछन्, छलफलको निष्कर्ष के हुन्छ त्यस अनुसार निर्णय गर्छाै,’ दरवार हेरचाह अड्डा प्रमुख हरि भुषालले भने ।
गोरखा संग्रहालय भने बन्द नहुने
गोरखा संग्रहालय भने बन्द नहुने भएको छ । आवश्यक स्वास्थ्य सुरक्षा मापदण्ड अपनाएर संग्रहालय संचालन गरिने बताइएको छ । ‘हामीलाइ बन्द गर्ने निर्देशन छैन, आवश्यक स्वास्थ्य सुरक्षा मापदण्ड अपनाएर संचालन गर्छाै,’ संग्रहालय प्रमुख नवराज अधिकारीले भने । एक पटकमा २५ जना भन्दा बढीलाइ संग्रहालय प्रवेश गर्न नदिइने उनले बताए । संग्रहालय आउने पर्यटकलाई मास्क अनिवार्य गरिएको र प्रवेशद्धारमा ह्याण्ड वासिङ स्टेशन समेत राखिएको उनले जानकारी दिए ।