असार १६, गोरखा । गोरखा नगरपालिकाका असहाय गर्भवती तथा सुत्केरीहरुलाई आर्थिक सहयोग गरिएको छ । गोरखा नगरपालिकाको असहाय गर्भवती तथा सुत्केरी महिला राहत कोष मार्फत उनीहरुलाइ सहयोग गरिएको हो ।

नगर क्षेत्रका असहाय तथा विपन्न गर्भवती र सुत्केरीको सहयोगार्थ नगरपालिकामा कोष स्थापना गरिएको छ । कोषमा चालु आर्थिक बर्ष ५ लाख रकम विनियोजन भएको थियो । सोही रकमबाट मंगलवार देखि रकम वितरण गर्न थालिएको नगर उपप्रमुख बिना कुमारी श्रेष्ठले बताइन् । ‘अलि पहिले देखि कार्यक्रम शुरु गर्नुपर्ने थियो तर कार्यविधि बनाउन केही समय लाग्यो,’ उनले भनिन्, ‘फेरी कोभिडले पनि समस्या बनायो ।’ कोष मार्फत सोमबार वडा नम्बर ५ र ६ का पाँच जनालाई जनही दश हजार नगद सहयोग गरिएको उनले बताइन् ।

आर्थिक अभावका कारण गर्भवती तथा सुत्केरी दिदीबहिनीहरु पोषिलो आहारबाट बञ्चित हुन नपरोस् भन्ने कार्यक्रमको मुख्य उदेश्य रहेको उनको भनाइ छ । उक्त कार्यक्रमले आमा र बच्चा दुवैलाइ कुपोषण हुन बाट बचाउन समेत सहयोग पुग्ने अपेक्षा समेत गरिएको छ । रकम प्राप्तीका लागी वडा कार्यालयमा निवेदन दिन सकिने छ । ‘पहिले पहिचान र छनोटको जिम्मा स्वास्थ्य चौकीलाइ दिएका थियौ, अहिले वडालाई पनि भनेका छौ,’ उपप्रमुख श्रेष्ठले भनिन् । उक्त कोषका लागी आगामी आर्थिक बर्षमा पनि पाँच लाख रकम विनियोजन भएको उनले जानकारी दिइन् ।