असार २९, गोरखा । निषेधाज्ञाका कारण लामो समय देखि बन्द रहेका जिल्लाका होटल, रेष्टुरेष्ट, खाजा घर र मिठाइ पसलहरु संचालनमा आउने भएका छन् ।

सोमवार बसेको जिल्ला कोभिड व्यवस्थापन समितिको बैठकले यही असार ३० गतेबाट संचालन गर्न पाउने निर्णय गरेको हो । ‘बिहान ५ देखि साँझ ५ बजेसम्म खोल्न पाउछन्,’ प्रमुख जिल्ला अधिकारी शालिग्राम शर्मा पौडेलले भने, ‘तर ग्राहकले त्यही बसेर खान मिल्दैन, खानेकुरा अर्डर गर्ने अनि प्याकिङ गरेर लानुपर्छ ।’ टेकअवे र होम डेलिभरी सेवा मात्र संचालन गर्न पाउने उनले बताए ।

होटल तथा लजको हकमा भने जनस्वास्थ्यको निर्धारित मापदण्ड पालना गरी कुल कोठा संख्याको एक तिहाइ नबढ्ने गरी संचालन गर्न पाउने व्यवस्था गरिएको छ । कोठाहरु प्रत्येक दिन अनिवार्य रुपमा निसंक्रमण गर्नुपर्ने छ । यसअघि निश्चित समय छुट्याएर संचालन हुदै आएका अन्य व्यवसाय संचालनको अवधि पनि बढाइएको छ ।

सोमवारको बैठकले असार ३० गतेबाट बिहान ५ देखि साँझ ५ बजेसम्म उक्त पसलहरु संचालन गर्न पाउने निर्णय गरेको हो । अहिले खाद्यान्न, तरकारी तथा फलफूलका पसलहरु बिहान ५ बजेदेखि ११ बजेसम्म र अन्य पसल बिहान १० देखि २ बजेसम्म संचालन हुदै आएका छन् । बैठकले साउन ९ गतेसम्मका लागी निषेधाज्ञा लम्व्याउने निर्णय समेत गरेको छ ।

धार्मिक स्थलको पुजाआजामा अझै रोक लगाइएको छ । संग्रहालय, कर्वड हल, फुटसल, खेलकुद मैदान, पार्टी प्यालेस, सिनेमा हल, डान्स सेन्टर, व्यूटी पार्लर, सैलुन र जिम खाना संचालनमा रोक लगाउने समितिको निर्णय यथावत रहेको प्रजिअ पौडेलले बताए ।