साउन १३, गोरखा । गोरखा नगरपालिका–११ बिरिन्चोक स्थित बरथोकका राम प्रसाद अर्यालले व्यवसायिक रुपमा कृषि पेशा अंगालेको तीन बर्ष भयो ।

भारतबाट कडकनाथ (कालो कुखुरा) को चल्ला ल्याएर उनले कुखुरा पालन शुरु गरेका थिए । सुरुवाती चरणमा सात लाख लगानी गरेको उनी बताउछन् । कडकनाथ कुखुराबाट व्यवसायिक कृषि पेशा शुरुवात गरेका उनले अहिले बट्टाई, टर्कि, लौकाट, कालिज, लोकल कुखुरा लगायतका पंक्षीहरु पालन गर्दै आएका छन् ।

करिव १८ प्रजातिका पंक्षीहरु रहेको उनी बताउछन् । ‘कालो कुखुराबाट कामको सुरुवात गरेको हुँ,’ उनले भने, ‘अहिले बदेल, गाई, परेवा लगायतका पशुपंक्षीहरु पनि पाल्दै आएको छु ।’ आफ्नै दश रोपनी जग्गामा फार्म संचालन गरेको उनले जानकारी दिए । फार्ममा अहिले करिव १५ शय कडकनाथ जातको कुखुरा, ६ शय बट्टाई रहेका छन् ।

स्याकिने, घाँटी खुइले, वन राजा जातका लोकल कुखुरा र सोपिस अन्तरगत ब्रम्हा कुकीन, सिल्कि, पुलिस लगायतका पंक्षीहरु पनि रहेको अर्यालले बताए । आइरनको मात्रा बढी, कोल्डस्टोर कम र स्वास्थ्यका लागी फाइदाजनक रहेकाले कालो कुखुरा पालन तर्फ आकर्षित बनेको उनले जानकारी दिए ।

अहिले उनको लगानी बढेर ५० लाख पुगेको छ । चल्ला उत्पादन गर्ने मेसिन उनीसँगै छ । ‘ह्याचिङ मेसिन छ, त्यहीबाट चल्ला पनि उत्पादन गर्दै आएको छु, अहिले बाहिरबाट चल्ला ल्याउनुपर्दैन,’ उनले भने । चल्ला र माउ दुवै बिक्री गर्ने गरेको उनी बताउछन् । ‘बढी पोखरा पठाउछु, केही स्थानीय बजारमा पनि बिक्री हुन्छ,’ उनले भने ।

उनका अनुसार चल्लाको बढी डिमाण्ड हुने गरेको छ । मासिक करिव साढे दुइ लाख आम्दानी हुने उनले बताए । फार्ममा काम गर्नका लागी अहिले दुई जना कामदार छन् । गाई, बाख्रा, भैसी र माछा पालन गर्ने योजना समेत रहेको अर्याल बताउछन् ।