भदौ १, गोरखा । गण्डकी प्रदेश सरकारको ‘एक निर्वाचन क्षेत्र एक सडक’ कार्यक्रम अन्तरगत जिल्लाको चार निर्वाचन क्षेत्रमा सडक कालोपत्रे सँगै स्तरोन्नतीको काम भइरहेको छ ।

निर्वाचन क्षेत्र नम्वर १ ‘क’ मा ढुङ्गागाडे भन्ज्याङ बुंकोट नाम्जुङ घैरुङ मनकामना सडकको १२ किलोमिटर सडक कालोपत्रेको काम भइरहेको छ । ३२ करोड ९१ लाख लागतमा कालोपत्रे हुने उक्त सडकको ठेक्का लामा कन्स्ट्रक्सनले पाएको हो । दुई बर्षमा काम सक्ने गरी २०७६ साल कात्तिक ६ गते सम्झौता भएको थियो । हालसम्म ४ किलोमिटर सडक कालोपत्रे भइरहेको पूर्वाधार बिकास कार्यालयले जनाएको छ । कामको प्रगति ८० प्रतिशत रहेको बताइएको छ ।

निर्वाचन क्षेत्र नम्वर १ ‘ख’ मा बारपाक लाप्राक सडकको १३ किलोमिटर खण्ड स्तरोन्नतीको काम भइरहेको छ । सडक ग्राभेलका लागी एमएस शर्मा÷विविइ जेभीसँग ३४ करोड १५ लाखमा ठेक्का सम्झौता भएको छ । दुई बर्षमा सक्ने गरी २०७७ साल जेष्ठ ९ गते सम्झौता भएको कार्यालयका इन्जिनियर गणेश सुवेदीले बताए ।

हालसम्मको कामको प्रगति २० प्रतिशत रहेको उनले जानकारी दिए । वालुवामा रहेको दरौदी नदी माथिको पुल भत्किएपछि अहिले काम ठप्प छ । त्यस्तै निर्वाचन क्षेत्र नम्वर २ ‘क’ मा राधाकृष्ण मन्दिर कालामाटा पौवाटार बिरुवाटार मिलनचोक सलाङगिरी हटिया मझुवा सडक कालोपत्रेको काम भइरहेको छ । दश किलोमिटर सडक कालोपत्रेका लागी २०७६ साल असार १६ मा अमर कन्स्ट्रक्सन प्रालिसँग २३ करोड ३८ लाख ८७ हजार रकममा ठेक्का सम्झौता भएको हो ।

सम्झौता अनुसार दुई बर्षमा काम सक्नुपर्ने थियो । तर समयवधी सकिएपनि हालसम्म कामको ३५ प्रतिशत मात्र प्रगति रहेको कार्यालयका इन्जिनियर सुवेदी बताउछन् । हालसम्म दुई किलोमिटर सडक कालोपत्रे र ६ किलोमिटर नाला निर्माण भएको छ । ‘म्याद थपको लागी ठेकेदारले निवेदन दिएको छ, अघिल्लो लकडाउनको ६ महिना म्याद थप हुन बाँकी छ,’ सुवेदीले भने । निर्वाचन क्षेत्र नम्वर २ ‘ख’ मा ढोडेनी हुदै सिम्जुङ गगनपानी मल्ले भच्चेक अन्तरगतको १४ किलोमिटर सडक ग्राभेलको काम भइरहेको छ ।

दुई बर्षमा सक्ने गरी २०७६ कात्तिक २० गते ठेक्का सम्झौता भएको हो । कुल लागत २३ करोड ५१ लाख रहेको छ । विरुवा(नाना(गोरखा जेभीले कामको ठेक्का पाएको हो । हालसम्म कामको प्रगति ६० प्रतिशत रहेको बताइएको छ । निर्वाचन क्षेत्रका सडकमध्ये कतै कामको प्रगति सन्तोषजनक रहेको छ भने कतै अलपत्र छन् । ठेकेदारको लापरवाही र कार्यालयको वेवास्ताका कारण लापरवाही भएको हो ।