भदौ २८,गोरखा । चुमनुव्री गाउपालिका–१ को मनास्लु हिमाल आरोहणका लागि १ सय ८६ जनाले अनुमति लिएका छन् । मनास्लु आरोहणको लागि अनुमति लिनेको संख्या वढेसँगै सामागाउँमा पर्यटक खचाखच छन् ।

शेर्पा, गाइड, सहयोगी सहितको टोलि हिमाल आरोहणका लागि सामागाउँ पुगेका हुन् । मनास्लु पुगेका मध्ये केहि आधारशिविर तर्फ उक्लीसकेका छन् । अधिकाशं पर्यटक हेलिकप्टर मार्फत सिधै सामागाउँ आइपुगेको स्थानीयले बताए । सहयोयी र गाइडहरु भने पैदलमार्ग भएर पनि समागाउँ पुगेका छन् ।

पर्यटन विभागका अनुसार मनास्लु सहित कञ्चनजंगा, धौलागिरी हिमाल आरोहणका लागि अनुमति लिएका छन् । ति मध्ये सवैभन्दा वढी मनास्लु हिमाल आरोहणका लागि अनुमति माग्ने पर्यटकको संख्या वढी छ । मनास्लु हिमाल आरोहण शुल्क वापत मात्र एक करोड ८० लाख ९९ हजार सात सय २० रुपैया राजस्व संकलन भएको छ ।

मनास्लु संरक्षण क्षेत्र एमक्यापका अनुसार कोरोना जोखिम वढेसँगै जेष्ठ यता ट्रेकिङ रुट भएर एक जना पनि पर्यटक मनास्लु क्षेत्र पुगेका थिएनन् । पछिल्लो दुइ साताको अन्तरालमा भने हिमाल आरोहणका लागि मनास्लु क्षेत्र पुग्ने पर्यटकको संख्या वढेको छ । पैदलमार्गबाट भने अझै सुनसान छ । कोरोना जोखिमले पर्यटकको संख्या घट्दा सवैभन्दा वढी होटल ब्यवसायी समस्यामा परेका छन् ।