असोज १४, गोरखा । नेपाली कांग्रेसको १४ औँ महाधिवेशन अन्तरगत जिल्लाको प्रदेश सभा निर्वाचन क्षेत्रको अधिवेशन सम्पन्न भएको छ ।
दुइ संघिय निर्वाचन क्षेत्रका चार प्रदेश सभा क्षेत्रको अधिवेशन मंगलबार राती अवेर सम्पन्न भएको हो ।

निर्वाचन क्षेत्र नम्वर १ ‘क’ प्रदेश सभापतिमा खुन प्रसाद रेग्मी र ‘ख’ मा ठाकुर भट्ट चयन भए । रेग्मी निर्वाचित भएका हुन् भने भट्ट सर्वसम्मत चयन । निर्वाचन क्षेत्र नम्बर २ ‘क’ प्रदेश सभापतिमा दिर्घमान गुरुङ (नारायण) र ‘ख’ प्रदेश सभापतिमा दिनेश खनखवास बिजयी भएका छन् । १४ औ महाधिवेशन अन्तरगत उक्त पार्टीको यही असोज १५ गते प्रतिनिधी सभा क्षेत्र निर्वाचन अधिवेशन हुदैछ ।

१५ गते निर्वाचन हुने भनिएपनि समय तालिकामा केही हेरफेर गरिएको जिल्ला निर्वाचन अधिकृत देव महतले बताए । ‘१५ गते साँझसम्म मनोनयन दर्ता, दावी बिरोध, अन्तिम नामावली प्रकाशन लगायतका काम सक्छौ,’ उनले भने ‘१६ गते बिहान ८ बजेबाट मतदान शुरु हुन्छ ।’ उक्त अधिवेशनले प्रतिनिधि सभा निर्वाचन क्षेत्रमा सभापति सहितको कार्यसमिति र केन्द्रिय महाधिवेशन प्रतिनिधी चयन गर्नेछ । हालसम्म प्रतिनिधि सभा निर्वाचन क्षेत्र १ को सभापतिमा नारायण लामिछाने मात्र आकांक्षा देखाएका छन् । निर्वाचन क्षेत्र नम्वर २ मा गोविन्द गुरुङ, जिवन वानिया र मान प्रसाद धिताल आकांक्षी रहेको पार्टी स्रोतले जनाएको छ ।

उक्त अधिवेशनले एक निर्वाचन क्षेत्रबाट कम्तिमा २५ जना महाधिवेशन प्रतिनिधि पनि चयन गर्नैछ । खुल्ला तर्फ १४ जना र समानुपातिक तर्फ दश जना प्रतिनिधी चयन हुनेछन् । निर्वाचित सभापति स्वतः पदेन सदस्य हुने छन् । गोरखामा दुई प्रतिनिधि सभा निर्वाचन क्षेत्र छन् । प्रत्येक क्षेत्रबाट खुल्ला तर्फ हालसम्म करिव २० जनाले आकांक्षा देखाएका छन् । जिल्लाको अधिवेशन भने यही असोज १८ गते हुदैछ । १८ गते मनोनयन लगायतका अन्य काम सकेपनि १९ गते बिहानबाट मतदान शुरु गरिने जिल्ला निर्वाचन अधिकृत महतले जानकारी दिए ।

जिल्ला सभापति पदका लागी हालसम्म नन्दु न्यौपानेले आकांक्षा देखाएका छन् । उनी अहिले पार्टी जिल्ला सचिव पनि हुन् । अरु भने अहिले खुल्न चाहेका छैनन् ।