श्रावण ११,गोरखा । नेपाल सरकार मन्त्रिपरिषदले साविकको वारपाक–५ स्थित १५ जना जग्गा धनीको नाममा रहेको जग्गा ‘भूकम्प स्मृति पार्कको नाममा प्राप्त गरी सट्टाभर्ना दिने सहमति प्रदान गरेको छ । सोमबारको मन्त्रिपरिषद वैठकले ६ रोपनी १० आना ३ पैसा जग्गा नेपाल सरकारले भूकम्प स्मृति पार्क निर्माणका लागि ‘भूकम्प स्मृति पार्क गोरखा’ को नाममा प्राप्त गर्ने निर्णय गरेको हो ।

भूकम्प स्मृति पार्कको नाममा प्राप्त हुने जग्गामा नवढ्ने गरी सट्टाभर्ना दिनका लागि सहमति प्रदान गरेको मन्त्रीपरिषद निर्णयमा उल्लेख छ । भूकम्प स्मृति पार्क निर्माणका लागि बारपाकको जग्गाको विषय पेचिलो वन्दै आएको थियो । २०७२ वैशाख १२ को भूकम्पको केन्द्रविन्दु वारपाकमा भूकम्प स्मृति पार्क निर्माणाधिन छ । भूकम्पमा भत्किएका संरचना जस्ताको तस्तै देखिने गरी जिवित संग्राहालय वनाउने पनि योजना बनाइएको थियो । तर जग्गा विवादमा उत्त योजना अधुरै छ ।

बारपाकमा भूकम्प स्मृति स्तभ्भ भने निर्माणाधिन छ । राष्ट्रिय पुनर्निर्माण प्राधिकरण अन्तर्गत जिल्ला आयोजना कार्यान्वयन एकाइ (भवन) ले महाभूकम्पमा ज्यान गुमाएकाको सम्झनामा इपिसेन्टरमा पार्क बनाउन लागेको हो ।