गोरखाः चुमनुव्री गाउँपालिका–१ सामागाउँ स्थित मनास्लु हिमालमा हिमपहिरो गएको छ । सोमबार विहान करिव ११.३० वजेको हिमपहिरोमा परि १० वढी घाइते छन् । सोमबार साँझ सम्म दुइ जना घाइतेको मात्र उद्धार भएको छ । खराव मौसमका कारण अन्य घाइतेहरुको उद्धार हुन सकेको छैन । कैलाश र सिम्रिक एयरको हेलिकप्टर घाइतेको उद्धारका लागि सामागाउँ पुगेका थिए ।

साँझ सम्म मौसम नखुलेपछि दुइ वटा हेलिकप्टर पनि सामागाउँमै रोकिएका छन् । हेलिकप्टर वेसक्याम्पका लागि उडेपनि मौसम प्रतिकुलताका कारण ल्याण्ड हुन नसकेको हो । हिमाल आरोहणका लागि बिदेशी पर्यटकसँगै सहयोगीको रुपमा गएका अनुप राई सख्त घाइते छन् । क्याम्प ४ तर्फ अक्सिजनलगायत सामग्री लिएर जाँदै गर्दा हिमपहिरो खसेको हो ।

क्षतिको एकिन विवरण सोमबार साँझ सम्म आउन नसकेको प्रहरीले जनाएको छ । करिव ६ हजार ८ सय मिटर उचाइमा पहिरो खसेको हो । हिमपहिरोमा खसेकाहरुको मंगलवारबाट उद्धार थालिने प्रहरील जनाएको छ । मनास्लु हिमाल आरोहणका लागि चार सय ४ जनाले अनुमति पाएका छन् । कोरोना महामारी पछि यस वर्ष मनास्लु हिमाल आरोहणका लागि आरोहण अनुमति लिनेको संख्या वढी छ ।