गोरखा : चुमनुव्री गाउँपालिका अन्तरगत चुम क्षेत्रमा हिमचितुवा गणना शुरु भएको छ ।

ग्लोवल चेन्ज रिसर्च इन्ष्टिच्यूट एकेडेमी अफ साइन्सका डाक्टर विक्रम श्रेष्ठ र त्रिभुवन विश्वविद्यालयमा वन विज्ञान अध्ययन गर्दै आएका सचित तिमल्सीनाको टोलीले हिमचितुवाको गणना शुरु गरेका हुन् । ६० वटा क्यामेरा मार्फत हिमचितुवाको गणना गरिने श्रेष्ठले जानकारी दिए ।

तिन सय वर्ग किलोमिटर क्षेत्रमा क्यामेरा जडान गरी क्यामेरा ट्रयाप र फोटोमा देखिने चितुवाको छालाको धब्बाको आधारमा हिमचितुवाको गणना हुने छ । ‘हिमचितुवाको दिसा पनि संकलन गर्छौू,’ उनले भने । हिमचितुवा गणनाका लागि यो सिजन उपयुत्त रहेको पनि श्रेष्ठले बताए ।

तिन सय स्क्वायर किलोमिटर क्षेत्रमा ६० वटा क्यामेरा जडान गरेर अध्ययन गर्न लागिएको अध्ययन टोलीलले जनाएको छ । नुव्री र चुमको करिडोरमा हिमचितुवा रहेको अनुमान गरिएपनि कति संख्यामा छ भन्ने एकिन छैन । लोपन्मुख हिमचितुवा सँगै संकटापन्न अवस्थामा रहेको हिमाली विरालोको पनि गणना गर्ने उनले बताए । गत वर्ष पनि सोहि टोलीलले नुव्री क्षेत्रमा हिमचितुवाको गणना गरेको थियो ।

नुव्री क्षेत्रमा गत वर्ष तिन देखि चार वटा हिमचितुवा भेटिएको अनुमान गरिएको छ । फागुन सम्म हिम चितुवाको अध्ययन गरि एउटा निष्कर्षमा पुग्ने अध्ययन टोलीको लक्ष्य छ ।