गोरखा : पालुङटार नगरपालिका मेयर विवश चिन्तनका स्वकीय सचिव अशोक मरहट्टामाथि कुटपिट भएको छ ।

शनिवार पालुङटार नगरपालिकाको कार्यालय परिसरमै उनीमाथि कुटपिट भएको हो । दुर्गालाल श्रेष्ठले आफूमाथि हातपात गरेको मरहट्टाले बताए । श्रेष्ठ नेकपा माओवादी केन्द वडा नम्वर २ का पाटी इन्चार्ज हुन् भने मरहट्टा पनि माओवादी केन्द्र निकट नै हुन् ।‘आज गण्डकी प्रदेशका सभामुखहरुको स्वागत कार्यक्रम थियो,’ उनले भने, ‘त्यही कार्यक्रम सकेपछि बाहिर निस्कने बेला त सँग काम छ भन्दै उहाले मलाई तानेर लानुभयो, चुनावअघिको आँपपिपलमा लागेको ऋण कहिले तिर्छस् भन्नुभयो, मैले तपाई वडा इन्चार्ज तपाईलाई थाहा होला भने, त्यसपछि एक्कासी कुट्नु भयो ।’ कुटपिटबाट देव्रे गाला र पछाडी भाग सुन्निएको उनले बताए ।

आँपपिपल अस्पतालमा उपचारपछि शनिबार साझ नै घर फर्किएका छन् । दोषीलाई कारवाहीको माग गर्दै इलाका प्रहरी कार्यालय ठाटीपोखरीमा उजुरी दिएको मरहट्टाले जानकारी दिए ।