गोरखा : शहिद लखन गाउपालिकाले सुत्केरी भेटघाट कार्यक्रम शुरु गरेको छ ।

प्रत्येक सुत्केरी महिलाको घरमै पुगेर वच्चा र आमाको स्वास्थ्य अवस्था वुझ्ने उदेश्यले सुत्केरी भेटघाट कार्यक्रमको सुरुवात गरिएको शहिद लखन गाउँपालिकाका स्वास्थ्य शाखा प्रमुख विरेन्द्र श्रेष्ठले बताए । स्वास्थ्यकर्मी र जनप्रतिनिधि सँगै महिला स्वास्थ्य स्वंयसेविका सुत्केरी महिलाको घरमा पुगेर स्वास्थ्य अवस्था वुझ्छन् । गाउँपालिकाको आठ वटा वडामा साउन यता सुत्केरी भएका ५२ जना महिला छन् । सवैको घरदैलोमा स्वास्थ्यकर्मी र स्वास्थ्यस्वंसेविका सहित पुग्ने गाउँपालिकाको योजना छ । भेटघाटमा पुग्दा सुत्केरी महिलालाई पौष्टिक आहाराको कोषेलि उपलब्ध गराउन गाउँसभाबाट निर्णय गराएर एक लाख छुट्टाइएको छ । एक जना सुत्केरी महिलालाई करिव आठ सय वरावरको पौष्टिक आहार र सरसफाईका सामाग्री लिएर घरदैलोमा पुग्ने गरेको स्वास्थ्य शाखा संयोजक श्रेष्ठले बताए ।

आयोडिन नुन, नङकट, टुथ पेष्ट र व्रस, सावुन, सनफ्लावर तेल, चना र अण्डा सहित स्वास्थ्यकर्मी र जनप्रतिनिधि सुत्केरीको घरदैलोमा पुग्ने गरेको गाउँपालिका उपाध्यक्ष इन्दिर तिवारीले बताइन् । घरदैलोमा पुग्दा ६ महिना सम्म आमाको दुध नछुटाउन आग्रह गर्ने गरेको उनले बताइन् । ६ महिना सम्म आमाको दुधलाई सर्वोपरी मानिन्छ । सवै पौष्टिक तत्व आमाको दुधबाट मात्र पाउने भएकाले सुत्केरी महिला सहित श्रीमान र अन्य परिवारलाई पनि ६ महिना सम्म वच्चालाई स्तनपान गराए÷नगराएको ख्याल गर्न सुझाव दिने गरेको उनले बताइन् ।

घरदैलोमा पुग्दा चिसोको समयमा वच्चालाई न्यानो सँग राख्न र आमालाई झोलिलो पोषिलो खानेकुरा खान सुझाव पनि दिने गरिएको छ ।