करिब ८८ अर्ब ३१ करोड लगानीमा बुढीगण्डकी ’क’ र बुढीगण्डकी ’ख’ दुई आयोजना निर्माण गरिने भएको छ । ऊर्जा मन्त्रालयले निर्माण गर्न लागेको बुढीगण्डकी जलविद्युत आयोजनाभन्दा केही माथि नौलो नेपाल हाइड्रोइलेक्ट्रिसिटी प्रालिले बुढीगण्डकी–क र ख निर्माण गर्न लागेको हो । सरकारले बुढीगण्डकी जलविद्युत आयोजना निर्माणका लागि कम्पनी खोलेको भएपनि लगानीको मोडालिटी नटुंगिँदा अलपत्र जस्तै छ। तर, त्यस आयोजनाभन्दा माथि निर्माण हुने आयोजनाहरुको भने विद्युत खरिदबिक्री सम्झौता (पीपीए) हुने भएको छ । प्रस्तावित १२०० मेगावाटको बुढीगण्डकी जलाशययुक्त जलविद्युत आयोजना भन्दा माथिल्लो बेल्टमा दुई जलविद्युत आयोजना निर्माण हुने भएको छ ।
नौलो नेपाल हाइड्रोइलेक्ट्रिक प्रालिले बिहीबार एक सूचना जारी गर्दै दुई आयोजना निर्माण गर्ने जानकारी गराएको हो । कम्पनीले दुई आयोजना निर्माणका लागि ८८ अर्ब ३१ करोड २७ लाख रुपैयाँ लागत अनुमान गरेको छ । कम्पनीका अनुसार बुढीगण्डकी ’क’ जलविद्युत आयोजनाबाट १०३ मेगावाट बिजुली उत्पादन गरिनेछ । वर्षायाममा प्रतियुनिट ४ र सुख्खायाममा पिकिङ अवधिका लागि प्रतियुनिट १०.५५ र नन–पिकिङ अवधिका लागि प्रतियुनिट ८.४० रुपैयाँ आयोजनाबाट उत्पादन हुने विद्युतको खरिद–बिक्रीदर तोकेको छ । आयोजनाबाट कुल प्रतिघण्टा ५४१.३७ गिगावाट बिजुली उत्पादन हुनेछ । यसबाट वर्षायाममा प्रतिघण्टा १७ करोड ६ लाख किलोवाट र सुक्खायाममा प्रतिघण्टा ३६ करोड ७ लाख किलोवाट बिजुली उत्पादन गर्नेछ। उक्त आयोजना निर्माणका लागि कम्पनीले ३१ अर्ब ३२ करोड १ लाख रुपैयाँ लागत खर्च हुने अनुमान छ । कम्पनीले बुढीगण्डकी ’ख’ जलविद्युत आयोजनाबाट २२६ मेगावाट बिलुजी उत्पादन गर्ने भएको छ। नेपाल विद्युत प्राधिकरणबाट आयोजनाबाट उत्पादन हुने विद्युतको खरिद–बिक्री दर पनि तोकेको छ । जसमा उक्त आयोजनाबाट उत्पादन हुने बिजुलीको खरिद तथा बिक्री मूल्य बुढीगण्डकी ’क’को बराबर नै तोकेको छ । आयोजनाबाट प्रतिघण्टा १,२१४.१२ गिगावाट बिजुली उत्पादन हुनेछ । त्यस्तै, आयोजनाबाट वर्षायाममा प्रतिघण्टा ३७ करोड ७३ लाख किलोवाट, सुक्खायाममा प्रतिघण्टा ८३ करोड ६६ लाख किलोवाट बिजुली उत्पादन हुनेछ । आयोजना निर्माणका लागि कम्पनीले ५६ अर्ब ९९ करोड २६ लाख रुपैयाँ खर्च हुने अनुमान छ । आयोजनाको सार्वजनिक सुनुवाइ चैत ९ गते हुने भएको छ । विद्युत नियमन आयोगले सार्वजनिक सुनुवाइमा सम्बन्धित सबै सरोकारवालालाई उपस्थित हुन समेत आह्वान गरेको छ । बुढीगण्डकी–क जलविद्युत आयोजना
२२६मेगावाटको बुढीगण्डकी–क जलविद्युत आयोजना गोरखाको आरुघाट गाउँपालिकामा प्रस्ताव गरिएको छ । आयोजनाबाट ५४१.३७ गिगावाट घण्टा विद्युतीय ऊर्जा उत्पादन हुन्छ। वर्षायाममा १ अर्ब ७० करोड ६० लाख ६ हजार ८०९ किलोवाट घण्टा उत्पादन हुनेछ। सुक्खायाममा भने ३७ करोड ७५ लाख ९ हजार ३२० किलोवाट घण्टा उत्पादन हुनेछ । आयोजनाको ३१ अर्ब ३२ करोड रुपैयाँ लाग्ने अनुमान गरिएको छ। यो जलविद्युत आयोजनाको पिकिङ अवधि ५ घण्टा रहेको छ ।बुढीगण्डकी–ख जलविद्युत आयोजना
यो आयोजनाको जडित क्षमता १०३.४ मेगावाट छ । यो आयोजना आरुघाट गाउँपालिकामा नै प्रस्ताव गरिएको छ । आयोजनाको ५.५ घण्टा पिकिङ आवर रहेको छ।। आयोजनाबाट १२१४.१२ गिगावाट आवर विद्युत उत्पादन हुनेछ । वर्षायाममा ३ अर्ब ७७ करोड ३२ लाख ६ हजार ७५७ किलोवाट घण्टा र सुक्खायाममा ८३ करोड ६६ लाख ८९ हजार ७३६ किलोवाट घण्टा उत्पादन हुनेछ । यो आयोजनाको लागत करिब ५७ अर्ब रुपैयाँ लाग्ने अनुमान गरिएको छ ।