गोरखाः चैत ५ गते हुने स्वतन्त्र विद्यार्थी युनियनको निर्वाचनका लागि शनिबार मनोनयन दर्ता भएको छ । स्ववियु निर्वाचनमा जिल्लाका चार विद्यार्थी संगठनले तालमेल गर्ने सहमति शुक्रबार गरेको थिए ।

गोरखा क्याम्पसको सभापति सहित सवै पदमा एकल उम्मेदवारी परेको छ । द्रब्यशाह वहुमुखी क्याम्पसको सभापति पदमा दुइ जनाको उम्मेदवारी परेको छ । अन्य पदमा एकल उम्मेदवारी परेको छ । गोरखा क्याम्पसको सभापतिमा अखिल क्रान्तिकारीका विष्णु पाण्डेको उम्मेदवारी परेको छ । सचिवमा नेविसंघका परशुराम भट्ट, कोषाध्यषमा अखिल क्रान्तिकारीका सुस्मिता दवाडीको उम्मेदवारी परेको छ । त्यस्तै प्रत्यक्षतर्फ पाँच सदस्यमा सविना गुरुङ, नारायण भट्ट, विनय गुरुङ, पुजा खड्का र राजाराम वोहोराको उम्मेदवारी परेको छ । समानुपातिक तर्फ सात सदस्यमा सिम्रन गुरुङ, रचन परियार, पुष्पा गुरुङ,विनिता मग्राती, अनुप तिवारी, रचना वसेल र विक्रम तामाङको उम्मेदवारी परेको छ ।

द्रब्यशाह वहुमुखी क्याम्पसको सभापतिमा नेविसंको तर्फबाट सौनक घिमिरे र स्वतन्त्रबाट प्रमोद जंग कुँवरले उम्मेदवारी दर्ता गराएका छन् । अन्य सवै पदमा भने एकल उम्मेदवारी परेको छ । घिमिरे चार विद्यार्थी संघठनको तर्फबाट उम्मेदवार वनेका हुन् । द्रब्यशाह क्याम्पसको नेविसंघका उपसभापति समेत रहेका कुँवरले भने इकाइ उपसभापतिबाट राजिनामा दिएर स्ववियुको सभापतिमा स्वतन्त्र उम्मेदवारी दर्ता गराएका छन् । फागुन २९ गते सम्म उम्मेदवारी कायम रहे सभापति पदमा द्रब्यशाह वहुमुखी क्याम्पसमा निर्वाचन हुने छ । त्यस्तै द्रब्यशाहकको स्ववियु सचिवमा अखिल क्रान्तिकारीका सचिन खनाल र कोषाध्यक्षमा नेविसंघका अविन श्रेष्ठको उम्मेदवारी परेको छ । सदस्यहरुमा राजेश श्रेष्ठ, विपना कोइराला, अनुप सिंखडा, प्रताप थापा मगर, नविना गुरुङले उम्मेदवारी दिएका छन् । नेपाल विद्यार्थी संघ, अनेरास्ववियु(क्रान्तिकारी), अनेरास्ववियु, नेपाल समाजवादी विद्यार्थी युनियन विच तालमेल गरी सहमतिमा उम्मेदवारी दिने शुक्रबार सहमति जुटेको थियो । शुक्रबार भएको छलफलबाट गोरखा क्याम्पसको सभापति सहित कोषाध्यक्ष र ३ सदस्य अखिल क्रान्तिकारीले लिने गरी सहमति जुटे पछि सोहि अनुसार उम्मेदवारी दर्ता भएको छ । नेपाल विद्यार्थी संघलाई सचिव, सहसचिव र तिन सदस्य, अनेरास्ववियूलाई उपसभापति र दुइ सदस्य, नेपाल समाजवादी विद्यार्थी युनियनले दुइ सदस्य पाउने गरि तालमेल भएको हो ।

सहमति अनुसार द्रब्यशाह वहुमुखी क्याम्पसको सभापति कोषाध्यक्ष सहित तिन सदस्य नेविसंघ, उपसभापति, सचिव र ३ सदस्य अनेरास्ववियु क्रान्तिकारी, सहसचिव र १ सदस्य अनरास्ववियु, नेपाल विद्यार्थी समाजवादी युनियनले ३ सदस्य पाउने गरी सहमति जुटेको थियो ।

त्यस्तै भवानी वहुमुखी क्याम्पसका नेपाल समाजवादी विद्यार्थी युनियनले नेतृत्व लिने सहमति अनुसार उम्मेदवारी दर्ता भएको छ । स्वतन्त्र विद्यार्थी युनियनको निर्वाचन त्रिभुवन विश्वविद्यालयले मिश्रित निर्वाचन प्रणालीबाट गर्ने भएको छ । प्रत्यक्ष र समानुपातिक प्रणालीबाट स्ववियुको पूर्ण कार्यसमिति बन्नेछ । विद्यार्थी संख्याको आधारमा स्ववियु कार्यसमिति बन्ने व्यवस्था छ । दुई सय भन्दा कम विद्यार्थी भएका क्याम्पसमा ११ सदस्यीय कार्यसमिति हुनेछ । एक हजारसम्म विद्यार्थी भएका क्याम्पसमा १५ जना, तीन हजारसम्म विद्यार्थी संख्या भएको क्याम्पसमा १९ जना र त्यसभन्दा माथि विद्यार्थी संख्या रहेको क्याम्पसमा २१ जनाको निर्वाचित कार्यसमिति हुनेछ । अध्यक्ष, सचिव, कोषाध्यक्ष प्रत्यक्षबाट चुनिने छन् । उपाध्यक्ष र सहायक सचिवका लागि दोस्रो चरणको मतदान हुनेछ । पूर्ण कार्यसमिति बनेपछि कार्यसमिति बाटै उपाध्यक्ष र सहायक सचिवका लागि दोश्रो चरणको मतदान गरी छनोट गरिने छ ।

त्यसअनुसार पदाधिकारी पाँच जनाको पदाधिकारीमा ३ प्रत्यक्ष दुई समानुपातिक हुनेछन् । सदस्यमा प्रत्यक्ष र समानुपातिका गरी ५०/५० प्रतिशत आउने छन् ।