पालुङटार नगरपालिका स्थित लिगलिग कोटमा आज हुने लिगलिगे साइकल दौडको सम्पुर्ण तयारी पुरा भएको छ ।

लिगलिग भिलेज स्पोर्टसको आयोजनामा प्रतियोगीता हुन लागेको हो । कुल ५३ किलोमिटरको दुरीमा हुने दौडमा इलाइट, पुरुष मास्टर र स्थानिय गरी ३ विधामा पुरस्कारको ब्यवस्था गरिएको छ । साइकल दौडका लागि हर्मी भञ्ज्याङ–मकुन डाडाँ आँपपिपल अस्पताल– बिरबारी–ओख्ले पुल हुदै लमजुङको राईनास–गरमबेशीबाट पुन ः गोरखाको चेपेघाट–हवाई ग्राउण्ड–तालपोखरी–ठाटीपोखरी–लुईटेल–बडडाडाँ–मैबल–बिजुली डाडाँहुदै लिगलिगकोट सम्म रुट तय भएको छ । इलाइट तर्फ समूहका सहभागीहरु तर्फ प्रथमदेखी पाँचौ स्थानसम्मलाई ७५, ५०, ३०, १५ र ७ हजार ५०० रुपैयाँ नगद पुरस्कार दिइनेछ । त्यस्तै गरी, पुरुष मास्टर समूहमा प्रर्थम हुनेलाई १५ हजार, दोस्रोलाई १० हजार र तेस्रो हुनेलाई ५ हजार नगद प्रदान गरिने छ । स्थानिय तर्फ पालुङटार, गोरखा नगरपालिका र सिरानचोक गाउँपालिका तथा लमजुङको राईनास र भानु नगरपालिकाका बासीन्दा सहभागी हुन सक्नेछन् । यसमा प्रथम, द्वितिय र तृतिय हुनेलाई ५, ३ र २ हजार नगद प्रदान गरिने भएको छ । यस बर्षको दौडमा १०० जनाले सहभागीता जनाउने आयोजकले अनुमान गरेको छ । प्रतियोगिता सम्पन्न गर्न करिव ३० लाख खर्च हुने आयोजकले जनाएको छ ।