गोरखाः शुक्रबारबाट गोरखा दरवारमा २० औँ सवा लाख रोट महोत्सव शुरु भएको छ ।
सिद्धाश्रम शक्ति केन्द्रको आयोजनामा ११ दिने महोत्सवको आयोजना गरिएको हो । शुक्रबार पहिलो दिन दिन गोरखा वजारबाट शोभयात्रा सहित गोरखा दरवार पुगेर गोरखनाथलाई रोट अर्पण गरीएको थियो । ११ दिन सम्म चल्ने महोत्सवमा सवालाख रोट गोरखनाथलाई अर्पण गरिने छ । महोत्सव अवधिभर प्रत्येक दिन विशेष पुजा, हवन, स्तुति वन्दना, लगायतका कार्यक्रम हुने छन् । महोत्सवले धार्मिक पर्यटक भित्राउन सघाउ पुग्ने विश्वास लिइएको छ । केन्द्रले २०६१ साल देखि सवालाख रोट महोत्सव गर्दै आएको छ । महोत्सवका लागि २५ लाख खर्च लाग्ने अनुमान गरिएको छ । गौ, जौ वा चामलको पिठोबाट तयार गरिएको ताइ र भुग्रे गरि दुइ थरी रोट गोरखनाथमा चढाउने गरिन्छ । हरेक मौसममा नयाँ अन्नवाली भित्रयाएपछि नयाँ अन्नको पिठोलाई घिउमा पकाएर रोट बनाई गोरखनाथलाई अर्पण गरेर मात्र खाने धार्मिक विश्वास यहाँका केहि स्थानीयहरुको छ ।