गोरखाः बैदेशिक रोजगारमा जान चाहनेहरुलाई सिपमुलक तालिममा जोडदिनुपर्ने एक कार्यक्रमका सहभागीले बताएका छन् ।

विहिबार सुरक्षित आप्रवासन (सामी परियोजना) को आयोजनामा भएको अन्तरक्रिया कार्यक्रमका सहभागीले वैदेशिक रोजगारमा जानेको सिप सिकाइको अवस्था कमजोर रहेको बताएका थिए । २०७६ बाट गोरखामा सामी परियोजना शुरु भएको थियो । परियोजनाले वैदेशिक रोजगारीको क्रममा भोगेको ठगी लगायतका समस्या समाधानका लागि सहिजकरण गर्दै आएको छ । परियोजनाले सामाजिक परामर्श, कानुनी परामर्श लगायतको सहिजकरण पनि गर्ने गरेको छ ।

वैदेशिक रोजगारीमा जानुपुर्वको तयारीका वारे अनुशिक्षण दिनुपर्नेमा सहायक प्रमुख जिल्ला अधिकारी पुष्कर रानाले जोड दिए । ‘गइसकेका मानिसमा परेका अप्ठारो फुकाउनका साथै जानु भन्दा अघि पनि वैदेशिक रोजगारमा देखिने समस्याका वारेमा जानकारी र सचेतना दिने तवरले भुमिका खेलौँ, सिप मुलक तालिममा जोड गरौँ,’ उनले भने । जिल्ला समन्वय समितिका प्रमुख मोहन वहादुर थापाले वैदेशिक रोजगार गएका परिवारलाई लक्षित गरेर परियोजनाले संचालन गरेको परामर्शका कार्यक्रमले आत्मवल वढेको बताए ।

चालु आर्थिक वर्ष मात्र परियोजना लागु भएको पालुङटार र गोरखा नगरपालिका, वारपाक सुलिकोट, शहिद लखन र अन्य पालिकाहरुमा दर्ता भएका ९३ मध्ये ४२ वटा समस्या समाधान गरेको छ । चालु आर्थिक वर्ष सवैभन्दा वढी २७वटा ठगी, १८ वटा उद्धारका निवेदन दर्ता भएको थियो । कार्यक्रममा गोरखा नगरपालिकाकी उपप्रमुख मसली मायाँ थोकर लगायतले मन्तब्य राखेका थिए ।