गोरखाः गोरखा नगरपालिका– ५ पस्लाङमा संस्कृति पहिचानका लागि प्रर्दशनी कार्यक्रम भएको छ ।

कार्यक्रममा स्थानीय मगर समुदायको सक्रियता नगरपालिकाको सहयोग र गोरखा सामुदायिक सिकाइ केन्द्रको सहजिकरणमा भएको थियो ।
मगर समुदायमा सांस्कृति सम्पदाहरूको प्रवद्र्धनका लागि खोजी, चासो र जागरण बढाउन सरोकार पक्षहरू बिच उक्त कार्यक्रम गरिएको सिकाइ केन्दले जनाएको छ ।
आदिकाल देखि नै जोडिदै आएका मगर समुदायहरूसँग रहेका मूर्त र अमूर्त सांस्कृतिक सम्पदाहरूको खोज तथा पहिचान गरी सूचीकरण गर्न प्रदर्शनी कार्यक्रममा मारूनी नाच, पञ्चेबाजा, दोहोरी झ्याउरे जस्ता विभिन्न संस्कृतिक प्रदर्शनी गरिएको थियो । कार्यक्रममा सांस्कृतिक प्रवद्र्धन कार्यलाई सरोकारवाला समुदायको चासो र सरोकारको विषय बनाउने सन्दर्भमा स्थानीय सांस्कृतिक सम्पदासँग सम्बन्धित ९ जना स्रोत व्यक्ति रहेको मगर संस्कृति प्रवद्र्धन रोष्टर समेत गठन गरिएको छ ।

संस्कृति प्रवद्र्धनलाई आयआर्जन सँग जोड्ने विषयमा खोज गर्ने सन्दर्भमा अनौपचारिक शिक्षा अन्तरगत गोरखा नगरपालिकाको आर्थिक सहयोगमा सो कार्यक्रम सञ्चालन भइरहेको छ । गोरखा नगरपालिका प्रमुख कृष्ण राना मगरको प्रमुख आतिथ्यतामा भएको कार्यक्रममा पस्लाङ टोल विकास समितिका अध्यक्ष भाइकाजी आले, गुठीका अध्यक्ष थल वहादुर थापा, वडा नं ५ का कार्यवाहक वडा अध्यक्ष हरेरम पोखरेल, होमस्टे अध्यक्ष मान वहादुर राना र पञ्चेबाजा समूहका जुन वहादुर रानाले लगायतले मन्तब्य राखेका थिए ।
कार्यक्रम सांस्कृतिक सम्पदाको महत्व, यसले समुदाय सदस्यहरूमा प्रदान गर्ने आत्म सम्मान, आत्मा विश्वास र जीवनसँग यसलाई कसरी जोडेर लान सकिन्छ भन्ने सन्दर्भ सहजीकरण गरिएको थियो ।