गोरखा ः चुमनुव्री गाउँपालिका–१ सामागाउँमा रहेको मनास्लु हिमालको आरोहण शुरु भएको छ । अघिल्लो आइतबारबाट शरद ऋतुमा मनास्लु हिमाल आरोहण शुरु भएको होे । आइतबार मात्र पाकिस्तानी दम्पती र तीन जना नेपाली गरी पाँच जनाले मनास्लु हिमालको सफल आरोहण गरेका छन् ।

तीन जना शेर्पाहरुको साथमा पाकिस्तानी दम्पती अहमद उजैर र अनुम उजैर बिहान मनास्लुको शिखरमा पुगेका सेभेन समिट टूेक्सले जनाएको छ । यो सिजन मनास्लु हिमाल आरोहणमा लागि उपयुक्त मानिन्छ । यस वर्षको शरद ऋतुमा मनास्लु आरोहणका लागि तीन सय एक जनाले अनुमति लिएको पर्यटन विभागले जनाएको छ । हिमाल आरोहणका लागि आरोही मनास्लु आधारशिविर पुगीसकेका छन् ।

मनास्लु हिमाल आरोहण अनुमति बापत सरकारले यो सिजनमा तीन करोड ४० लाख रुपैयाँ रोयल्टी सङ्कलन गरेको छ । मनास्लु विश्वको आठौँ अग्लो र नेपालको सातौँ अग्लो हिमाल हो । सबैभन्दा पहिले सन् १९५६ मे ९ तारिखमा जापानी नागरिक तोसियो इमनिसी र नेपाली ग्याल्जेन नोर्बु शेर्पाले आठ हजार एक सय ६३ मिटर अग्लो मनास्लुको सफल आरोहण गरेका थिए ।