गोरखाः पालुङटार नगरपालिका–६ गाइखुर स्थित लक्ष्मी माध्यमिक विद्यालयमा अध्ययनरत विद्यार्थीलाई शैक्षिक सामाग्री वितरण गरिएको छ ।

मंगलबार विमला बिनिस्मा पन्त फाउण्डेसनले विद्यालयमा अध्ययरत विद्यार्थीहरुलाई करिव दुइ लाख वरावरको स्टेशनरीका सामाग्री तथा पोशाक हस्तान्तरण गरेको हो । विद्यालयमा अध्ययनरत एक सय २५ जना विद्यार्थीलाई कापि, पेन र पेन्सील सहयोग गरिएको छ । २१ जनालाई विद्यालय पोशाक, २२ थान ब्याग पनि सहयोग गरिएको विमला विनिस्मा फाउण्डेशनका नेपाल संयोजक सुमन कट्टेलले जानकारी दिए ।

कार्यक्रममा विद्यालयका प्रध्यानाध्यापक राजन भट्टराई, संस्थाका सल्लाहाकार कविन्द्र वुर्लाकोटी, टिम लिडर सुदिप पन्त लगायतको सहभागीता रहेको थियो । यो वर्ष पालुङटार नगरपालिका क्षेत्रको मदनेडाडा, धर्मोदय, त्रिवेणी, रजगरे, मावि, सरस्व्ती र नवज्योती आधारभुत विद्यालयका विद्यार्थीलाई पनि फाउण्डेसनले शैक्षिक सामाग्री वितरण गरिसकेको कट्टेलले जानकारी दिए । ‘आगामी वर्ष पालुङटार नगरपालिका भित्रका सवै विद्यालयमा यो कार्यक्रम विस्तार गर्ने योजनामा छौँ,’ उनले भने ।

पालुङटार नगरपालिका–६ घर भइ हाल अष्ट्रेलियामा रहेका प्रकाश जंग पन्तको अगुवाईमा आर्थिक संकलन गरि नगरपालिका क्षेत्रको विद्यालयमा अध्ययनरत विद्यार्थीलाई स्टेशनरी लगायतका सामाग्री वितरण गर्ने अभियान शुरु गरिएको छ । वैदेशिक रोजागारीको सिलसिलामा कमाएको रकमबाट केहि छुट्टाएर विद्यार्थीलाई स्टेशनरी लगायतका सामाग्री वितरण गर्ने गरेको पन्तले बताए ।