गोरखा ः बारपाक सुलिकोट गाउँपालिकामा भएको चौथो बारपाक सुलिकोट रनिङ्ग सिल्ड प्रतियोगिताको उपाधि माझथर माविले जितेको छ ।

बुधबार सम्पन्न भएको प्रतियोगितामा वडा नं. ३ को माझथर माध्यमिक विद्यालय पहिलो बनेको हो । पहिलो हुने विद्यालयले नगद ४० हजार, ट्रफी र रनिङ सिल्ड पुरस्कार पाएको छ । त्यस्तै वडा नम्वर १ को हिमालय माध्यमिक विद्यालय बारपाक दोस्रो भएको छ ।

दोस्रो भएको हिमालयले नगद २६ हजार छ सय ६६ रुपैया र ट्रफी प्राप्त गरेको गाउँपालिकाका शिक्षा संयोजक भिम कुमार श्रेष्ठले बताए । त्यस्तै गरि वडा नं. ६ को सुर्य ज्योति माध्यमिक विद्यालय ताकुकोट तेस्रो भएको छ । तेस्रो भएको विद्यालयले भने १३ हजार तिन सय ३३ रुपैया र ट्रफी प्राप्त गरेको श्रेष्ठले बताए ।

पहिलो हुने विद्यालय माझथर माध्यमिक विद्यालयले विभिन्न विधा अन्तरगत भएको खेलमा ९ स्वर्ण, ५ रजत, २ कास्य पदक जितेको थियो । दोस्रो हुने हिमालय माध्यमिक विद्यालयले ७ स्वर्ण, ५ रजत,४ कास्य पदक जितेको थियो । तेस्रो हुने विद्यालय सुर्य ज्योति माध्यमिक विद्यालयले ७ स्वर्ण, ३ रजत, ६ कास्य पदक जितेका छ ।

माझथर माविले यस अघिको रनिङ सिलमा पनि पहिलो वनेको थियो । तिन दिन सम्म चलेको प्रतियोगीताको समापन कार्यक्रममा गाउँपालिकाका प्रमुख विष्णु भट्ट, उपप्रमुख सनमायाँ गुरुङ तथा जनप्रतिनिधि, कर्मचारी लगायतको सहभागीता रहेको थियो । प्रतियोगीतामा १० विद्यालयले सहभागीता जनाएका थिए ।