गोरखा ः सदरमुकामको हरमटारी खेलमैदानमा जारी कृषि, पर्यटन तथा ब्यपार प्रवद्र्धन मेला स्थलको स्टलमा जिल्लाका किसानले उत्पादन गरेको कृषिजन्य उपज प्रदर्शनमा राखिएको छ ।
मेला स्थलको यी स्टलले यहाँ पुग्ने आगन्तुकको पनि ध्यान तान्ने गरेको छ ।

स्टलमा नम्वर ६ मा रहेको कृषि प्रदर्शनीमा नौ केजी वरावरको काउली पनि प्रदर्शनमा रहेको छ । गोरखा नगरपालिका–७ की एक कुमारी वस्नेतले फलाएको उत्त काउली प्रदर्शनमा राखिएको हो । मेलाका लागि कृषि ज्ञान केन्द्र गोरखाले ११ वटै पालिकालाई पत्राचार गरि कृषि उपज प्रदर्शनमा ल्याउन भनेको थियो । उत्त स्टलमा जिल्लामा उत्पादन भएका सुन्तला, सखर, काउली, च्याउ, रैथाने वाली, आलु, फर्सी, केरा, साग मुला लगायतका कृषि उपज छन् ।

गोरखा नगरपालिका–४ का अर्जुन प्रताप राणाको वारीमा उत्पादन भएको सुन्तला पनि प्रदर्शनमा राखिएको छ । एउटै हागाँमा लटरम्म फलेको सुन्तालको हाँगा सहित प्रदर्शनमा राखिएको हो । उत्त सुन्तला विउ उत्पादनका लागि प्रयोग हुने कृषि ज्ञान केन्द्रकी मुना कडेलले बताइन् । त्यस्तै गोरखा नगरपालिका–१३ का किसान जित वहादुर भट्टले उत्पादन गरेको अकवरे खुर्सानी पनि प्रदर्शनमा राखिएको छ । उनले देउरालीको ७० रोपनी क्षेत्रफल समेटेर ब्यवसायीक खुर्सानी खेती गरेका छन् ।

त्यस्तै स्टल नम्वर ७ मा धार्चेमा उत्पादन भएको आर्गानिक कृषि उपज प्रदर्शनमा राखिएको छ । लेकको हावापानिमा उत्पादित अर्गानिक उत्पादनको स्वाद चखाउनका लागि कृषि उपज प्रर्दशनीमा राखिएको छ । स्टलमा ट्राउट माछा पनि रहेका छन् । धार्चे गाउपालिका–३ खोर्लावेसिको ९ वटा पोखरीमा ट्राउट माछा पालन गरिएको स्टलमा रहेका चेतवहादुर गुरुङले बताए ।

धार्चेमा उत्पादन भएको सिलाम, मास, सिमि, केराउ, कालो र सेतो भटमास, च्याउ, जिम्वु, दाल मस्याम लगायतका कृषि उपज पनि प्रदर्शनमा राखिएको छ । स्टलमा पुगेकाहरुलाई धार्चेमा उत्पादन भएको आर्गानिक कफिको स्वाद पनि चखाउने गरिएको छ । धार्चे क्षेत्रका विभिन्न पर्यटकीय स्थलको तस्विर पनि प्रदर्शनमा राखिएको छ ।