गोरखाः भिमसेनथापा गाउँपालिका–५ वगुवामा माघे सक्रान्ती पर्व गोरु जुधाई प्रतियोगीता तथा विविध सास्कृतिक कार्यक्रमका गरी मनाइएको छ ।

प्रतियोगीतामा ७ हल गोरु जुधाईएको थियो । जसमा २० मिनेट भन्दा बढी समय जुधेर प्रथम स्थान भिमसेन थापा गापा ४ धावाका गोरु धनी बिनोद रेग्मी र उत्कृष्ट गोरु जुधाईमा गोरखा नगरपालिका–१ छापथोकका गोरु धनी नेत्र प्रसाद भट्ट लाई क्रमश १० हजार र ९ हजार नगद पुरस्कार, प्रमाणपत्र सहित सम्मान गरिएको थियो ।

प्रतियोगितामा बाकी सबै गोरु धनिहरुलाई ८ हजार, ५ हजार,४ हजार र ३ हजारका दरले आयोजकले तय गरेको मुल्यांकनको आधारमा नगद पुरस्कार सहित प्रमाणपत्रले सम्मान गरिएको थियो । कार्यक्रममा स्थानीय युवा क्लब र महिला समुहहरुले विविध चेतनामूलक सास्कृतिक कार्यक्रमहरु प्रस्तुत गरेका थिए ।

आगामी बर्ष खेलकुदका थप कार्यक्रमहरुलाई पनि जोड्दै पर्यटन भित्राउने योजना रहेको आयोजकले जनाएको छ । माछापोखरी नेवार समाज, समुन्नत युवा क्लब, खान्चोक सेवा समाज,सृजनशिल युवा क्लब र नबजागरण बिकास समाज कसिन्थोक बगुवाको सहयोगमा कार्यक्रम भएको थियो ।

कार्यक्रममा भिमसेनथापा गापाका अध्यक्ष लोक प्रसाद बन्जरा,उपाध्यक्ष अमृता वस्ती, वडा नम्वर ५ का अध्यक्ष होम बहादुर बराम, गाउपालिकाका प्रमुख प्रशासकीय अधिकृत चित्र बहादुर अधिकारी, बासुदेव भट्ट, सिताराम भट्ट, सागर श्रेष्ठ लगायतले मन्तब्य राखेका थिए । माघिपर्व मेला तथा गोरु जुधाई कार्यक्रम व्यबस्थापन समितिका अध्यक्ष रामकुमार श्रेष्ठको अध्यक्षतामा भएको थियो ।