गोरखा ःधार्चे गाउँपालिकाले स्थापना दिवसको अवसरमा विभिन्न क्षेत्रका १७ जनालाई सम्मान गरेको छ ।

सर्वोच्च शिखर सगरमाथा, मनास्लु हिमाल आरोहण गर्ने आरोही तथा एसइइमा सर्वोत्कृष्ट अंक ल्याउने ब्यात्तित्वलाई सम्मान गरिएको छ ।

धार्चे गाउँपालिकाको लोगो सहित सगरमाथा हिमालको आरोहण गर्ने वडा नम्वर ४ का इमान गुरुङ र धार्चेको लोगो सहित मनास्लु हिमालको आरोहण गर्ने वडा नम्वर ५ कि नानुमायाँ गुरुङलाई सम्मान गरिएको छ ।

इमानलाई नगद ६० हजार र नानुमायाँलाई नगद ४० हजार सहित सम्मान गरिएको गाउँपालिकाले जनाएको छ । त्यस्तै धार्चे–४ का सगरमाथा आरोही मुलाल गुरुङ, तुलसिङ गुरुङ, पुर वहादुर गुरुङ, सुमन गुरुङ, विश वहादुर गुरुङ, राम वहादुर गुरुङ, सन्दिप गुरुङ, धार्चे ३ का ओम वहादुर गुरुङ र धार्चे ५ का विश वहादुर गुरुङलाई दोसल्ला ओडाएर सम्मान पत्रका साथ सम्मान गरिएको गाउँपालिकाका प्रमुख प्रशासकीय अधिकृत काजीमान सुनारले जानकारी दिए ।

त्यस्तै धार्चे गाउँपालिकाबाट पहिलो एसएलसी पास गर्ने धार्चे–३ का इन्द्र घले, गायक÷सर्जक धार्चे–५ का धन वहादुर गुरुङ, पत्रकार केशव गुरुङ, धार्चे गाउँपालिकाबाट एसईई परिक्षा २०७९ मा सवोत्कृष्ट अंक ल्याई पास गर्ने धार्चे–५ कि खुश्वु गुरुङ र उत्कृष्ट कार्यसम्पादन गर्ने कर्मचारी असिम गुरुङलाई पनि सम्मान गरिएको छ ।

असिमलाई नगद १० हजार सहित सम्मान गरिएको उनले बताए । गाउँपालिकाबाट एसइई परिक्षा २०७९ मा उत्कृष्ट नतिजा प्राप्त गर्ने केरौजा माविलाई पनि सम्मान गरिएको छ । नगद ५० हजार सहित विद्यालयलाई सम्मान गरिएको हो ।

धार्चे गाउँपालिकाका अध्यक्ष लक्ष्मण गुरुङको अध्यक्षतामा भएको कार्यक्रममा जिल्ला समन्वय समितिका प्रमुख मोहन वहादुर थापाको प्रमुख आतिथ्यता रहेको थियो ।

दिवसको अवसरमा आइतबार खोर्लावेसी र माछाखोला वजारको सरसफाई तथा ठाउँ÷ठाउँमा डस्वीनको ब्यवस्था पनि गरिएको थियो । त्यस्तै स्थापना दिवसको अवसरमा प्रभातफेरी लगायतका कार्यक्रमको पनि भएको थियो ।